Nunatta Eqqartuussivia: Aalisartoq 3,6 millioner koruuninik akiligassinneqassanngilaq
Iluliarmiu ukiut 36-it sinnerlugit raajarniartutut inuussutissarsiutilik, Jeremias Jensen, Namminersorlutik Oqartussanit katillugit 3,6 millioner koruuninik akiligassinneqaraluartoq, ukiut sisamat atorlugit eqqartuussivitsigut suliaq ingerlanneqareersorlu, Nunatta Eqqartuussiviata, februaarip 13-anni aalajangerpaa Jeremias Jensen pisuussuteqanngitsoq.
Jeremias Jensen, Jaajooq 75-inik ukioqartoq tuppalleqqaqisoq, KNR-imut ima oqarpoq.
- Qanorluunniit oqarnissara naluara, tassali tuppallernaruttormat pisuunngitsutut nalilerneqarnera qullersanit unnerluutigineqarnerma kinguneranik.
Jeremias Jensen Namminersorlutik Oqartussanit unnerluutigineqarpoq, sinerissami piffiit ilaanni, ukioq 2010-mi 25-riarluni raajarniarnermini pisassani 350 tonsit sinnerlugit pisaqarsimasutut.
Jeremias Jensenip 2009-mi raajartassani sinnerlugit aamma aalisarsimasutut unnerluutigineqarami ukioq 2010 aallartippaa 72 tonsit sinnilaarlugit sippuereerluni.
2012-ip naalernerani unnerluussisut allapput piumasaralugu, Jeremias Jensen 1,2 millioner koruuninik akiligassinneqassasoq aamma tunisinermini iluanaarutit 2,4 millioner koruunit arsaarinnissutaassasut.
- Taama unnerluutigineqarnera assorujussuaq uannut avaanngunarsimavoq, Jeremias Jensen oqarpoq.
Nunatta Eqqartuussivianut pisoq tunniunneqarmat tassani paasineqarpoq, unnerluussisunit paasissutissat pingaaruteqartut kukkunikkut, Jeremias Jensenimut nassiunneqarsimanngitsut, aamma paasineqarluni Jeremias Jensenip pisarisarsimasani eqqortumik nalunaarutigisarsimagai. Tassalu ilaatigut tamakku pissutigalugit, Jeremias Jensen Nunatta Eqqartuussivianit pisuunngitsutut isigineqarluni.
- Kisianni tassa ukiuni sisamani raajarnianngilagut. Oqartussanit raajartassatsinnit ukiut tamaasa tunineqartaralaurpugut, ukiumut 133 tonsinik aallarnernilu pingasuni pisarisassanik. Taakkuli kilisanneq ajorpagut imminut akilersinnaanngimmata.
Raajarniarnermik inuussutissarsiutilik, Jeremias Jensen 75-inik ukiulik taama oqarpoq.
Taassuma illersuisuatalu suliassaat tulleq tassaavoq, Jeremias Jensenip ukiuni sisamani aalisarsimannginnerani annaasaqaatit nalilersorneqarnissaat.
Jeremias Jensenip illersuisuiatalu, eqqartuussisuserisup, Gedion Jeremiassenip maannanut oqaatigisinnaannginnerarpaat, annaasaqaatit pillugit eqqartuussivitsigut ingerlatitseqqiissanerlutik.
