Nunatta Eqqartuussisuuneqarfiata 30-nik ukiulik paarineqartussanngortikkaa
Angutit pingasut ataatsimoorlutik pissutsini 21-ni unnerluutigineqarneranni suliaq maanna naammassineqarpoq.
Angutip 30-nik ukiullip toqutseriarsimasuut peqqarniitsumillu nakuusersimasutut pineqaatissinneqarneranik, 31-nillu ukiullip peqqarniitsumik nakuuseqataasimasutut qaammatini sisamani pineqaatissinneqarsimasunut inissiisarfimmiittussanngortinneqarneranik inerneqarpoq.
Nunatta Eqqartuussisuuneqarfiata eqqartuussiveqarfimmit aalajangiinertut aalajangiinera unnerluussisussaatitaasup Signe Suhrip eqqartuussisoqarfimmi aamma Nunatta Eqqartuussisuuneqarfiani unnerluussisuusup naammagisimaarpaa.
Kalaallit Nunaanni Politiit tusagassiuutinut ualeq manna taama nalunaaruteqarput.
Suliaq Eqqartuussisoqarfik Sermersuumit upernaaq suliarineqarpoq, tassanilu angutit marluk Nunatta Eqqartuussisuuneqarfiatulli aamma eqqartuussuteqarluni.
Pinerlineqartoq inuunerminik navianartorsiortoq
30-nik ukiulik nakuusernermi pinerlineqartumut 3,5 kiilumik oqimaassuseqartoq atorlugu niaquatigut anaataasimanera pillugu pinerlineqartup niaquata saarnga innarlerneqarmat eqqartuunneqartoq toqutseriarsimasutut eqqartuunneqartoq, politiit allapput.
Unnerluussisummilu pinerlineqartoq Danmarkimi pinasuartumik pisariaqartumillu ikiueqqaarfigineqarsimanngikkaluaruni inuunerminik navianartorsiussagaluartoq allassimavoq.
Peqqarniitsoq filmiliarineqartorlu
Nunatta Eqqartuussisuuneqarfiata nakuusernerup peqqarniilluinnartuunera, aamma 30-nik ukiullip nakuusernermik minutsinik arlalinnik sivisussuseqartumik filmiliornera pingaartuutippai.
Tamatumalu saniatigut tarnikkut qanoq inneranik misissuinerup aamma nakorsap eqqartuussisoqarnerani siunnersuisartup angutip paarineqartussanngortinneqarnissaanik innersuussuteqarnerat aamma pingaartuutillugit.
Angutit marluk Nunatta Eqqartuussisoqarfianit maanna eqqartuunneqartut saniatigut angut alla suliamut atatillugu aamma unnerluutigineqarpoq, taassuma Eqqartuussisoqarfik Sermersuup ukiumik ataatsimik qaammatinillu qulinik pineqaatissiissutaa akueriniarlugu aalajangernikuuaa.
