Nunatta Eqqartuussisuuneqarfianit toqutsisoq immikkut paarisassangortinneqartoq

Nunatta Eqqartuussisuuneqarfiata angut 36-nik ukiulik killiligaanngitsumik immikkut paarineqartussanngortillugu eqqartuuppaa.

Angut februaarimi 2023-mi pisimasumut angummik 53-inik ukiulimmik niaquatigut siatsivimmik ataasiaannarani anaasisimasutut timaatigullu 34-riarlugu isimmittaasimasutut, toqutsisimasutut eqqartuunneqarpoq.

Eqqartuussisoqarfik Kujallermi suliaq siorna aamma ingerlanneqarpoq, taamani aamma 36-nik ukiulik immikkut paarineqartussanngorlugu eqqartuunneqarpoq,  angutilli eqqartuussut Nunatta Eqqartuussisuuneqarfianut ingerlateqqitassanngorlugu aalajangiuppaa.  

Eqqartuussiviulli inerniliussaanik Nunatta Eqqartuussisuuneqarfia maanna assinganik inerniliivoq, suliamilu unnerluussisup Alexander Stürupip naammagisimaarpaa. 

- Ullumi eqqartuussutip inaarnera naammagisimaaqaara. Eqqartuussisoqarfik Kujallermi siorna eqqaartuussutip inaarnera atortussanngortinneqarpoq. Tassa imaappoq unnerluunneqartoq Nunatta Eqqartuussisuuneqarfianit immikkut paarisassanngortinneqarpoq, Alexander Stürup eqqartuussutip inaarnerata kingorna oqarpoq.

Qaqortumi toqutsineq 2023-mi piffissami februaarip pingajuata sisamaatalu akornanni pivoq, angullu februaarip qulingiluaani 2023-miit tigummigallarneqalerpoq.

Siornatigut pineqaatissinneqarnikuusoq

Angut nakuusersimasutut, pinngitsaaleeriarsimasutut eqqartuunneqarnikuuvoq, aamma Nunatta Eqqartuussisuuneqarfianit 2014-imi maanna eqqartuussaassutigisaanut assingulluinnartumi toqutsisimasutut 2012-imi ukiuni arfinilinni pineqaatissinneqarsimasunut inissiisarfimmiittussanngortinneqarnikuuvoq. 

- Taamani suliami pinerlineqartoq niaqqumigut anaaneqarluni timikkullu isimmittarneqarluni aamma toqutaavoq, Alexander Stürup oqarpoq.

Taanna 36-nik ukiulik eqqartuussineq tamakkerlugu pisuunnginnerarpoq, toqutsinermilu isiginnittoqanngitsoq, unnerluussisoq suliap eqqartuussiveqarfimmi naammassineqarnerata kingorna KNR-imut oqarpoq.

- Toqutsisoqarsimanerani suliani pingaarnertut unammillernartartoq tassaavoq, pinerlineqartup qanoq pineqarsimanerminik maaniilluni nassuiaateqarsinnaannginnera, taamaammat uppernarsaasiissutiginiakkat suliami uppernarsaatinut allanut atassuteqartariaqarput. 

- Pineqaatissinneqartorli tigummigallarneqartussanngorpoq, eqqartuussutip matuma aallartinnissaata tungaanut, unnerluussisoq oqarpoq.

Nutaamik pinerleqqaratarsinnaasoq

Eqqartuussinermi suliap ingerlanneqarnerani kingullertut, eqqartuussisup inuillu eqqartuussisussatut qinikkat aalajangiiniarlutik anillannginnerini, pineqaatissinneqartoq nakorsamit psykopatitut, assingusumillu nutaamik pinerleqqinnissaminut aalerinaatilerujussuusoq aamma sakkortuumik aqussinnaanngisaminik inuttut misikkarliuuteqartoq, nakorsamit eqqartuussisoqarnerani siunnersuisartumit nalunaarutigineqarsimasoq unnerluussisup pingaartippaa.

Eqqartuussisunut siulittaasup eqqartuussinerup saqqummiunnerani oqaatigaa, eqqartuussivik aalajangiinermi immikkut pingaartillugu eqqarsaatersuutigisimagaat suliami uppernarsaatit teknikkikkut tunngavillit, unnerluussisussaatitaasullu uppernarsaatit ilaatigut DNA-mik tunngavillit arlalialuit saqqummiussimavai, taakku tamakkiisumik isigalugit takutippaat pineqaatissinneqartoq taannaasoq pinerlisimasoq, unnerluussisoq Alexander Stürup oqarpoq.