Nunatta eqqartuussisuuneqarfiata eqqartuussisoqarfiup eqqartuussutaa aalajangersarpaa angullu 23-nik ukiulik inunnik marlunnik toqutsisimasutut paarineqartussanngortillugu. Toqqorsivimmit assiAssi: KNR // Anton Gundersen Lihn

Nunatta Eqqartuussisuuneqarfia aalajangersaavoq: Angut inuusuttoq marlunnik toqutsisutut paarineqassaaq

Inuit marluk Maniitsumi 2019-imi decembarip qaammataani peqqarniitsumik toqutaapput. Nunatta eqqartuussisuuneqarfia suliamut maanna inerniliivoq eqqartuussisoqarfiullu eqqartuussutaa aalajangersarlugu.

Angut inuusuttoq angummik arnamillu Maniitsumi 2019-imi peqqarniitsumik toqutsisimasutut piffissami killiligaanngitsumi paarineqartussanngorpoq.

Nunattami Eqqartuussisuuneqarfiata Eqqartuussisoqarfik Qeqqatap eqqartuussutaa ullumi aalajangersarpaa.

Tamanna tusagassiuutinut nalunaarummi allassimavoq.

Toqutsinerit siorna decembarimi pipput. Taamani Maniitsumi politiit pigaartui inuit marluk inuit najugaanni toqungasut nassaarineqarsimasut pillugit nalunaarfigineqarput.

Politiit sumiiffimmut ornigukkamik angut arnarlu savinnik assigiinngitsunik aappaa 39-riarluni aappaalu 70-riarluni kapineqarsimasut nassaaraat.

Unnerluussisussaatitaasoq: Inuit marluk peqqarniitsumik toqunneqarput

Angut eqqartuussisoqarfimmit siorna decembarimi toqutsisutut eqqartuunneqarpoq, taassumali eqqartuussut sakkukillineqaqqullugu suliassanngorteqqippaa. Tamanna pissutigalugu suliaq nunatta eqqartuussisuuneqarfianut suliassanngortinneqarpoq, tassanilu angut pisuunersoq pinngitsuunersorluunniit aalajangiiffigineqartussaanani.

Eqqartuussisuuneqarfiulli pineqaatissiissutigineqartoq – tassa paarineqartussanngortitsineq – naleqqunnersoq aalajangiiffigisussaallugu. Nunattalu eqqartuussisuuneqarfiata tamanna naleqquttuusoraa.

AAMMA ATUARUK Angut inuusuttoq Maniitsumi marlunnik toqutsisutut paarineqartussanngortitaasoq

Tamanna unnerluussisussaatitaasut ilorrisimaarutigigaat, eqqartuussivimmut suliassanngortitsisoq unnerluussisussaatitaasorlu, Emil Maegaard-Hoffmann erseqqissaavoq.

- Suliamut alianaqisumut tassa inuit marluk peqqarniitsumik toqutaanerannut tunngatillugu suliamut, maanna inerniliisoqarpoq. Politiit misissueqqissaarluarnerata kingunerisaanik pinerluuteqartut pinerluutigisaminut akisussaatinneqarpoq, Emil Maegaard-Hoffmann tusagassiuutinut nalunaarummi allappoq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat