Nunatta Danmarkimi umiarsualiveqarnera suliariumannittussarsiuunneqalerpoq
Nunatta Danmarkimi umiarsualiveqarnera suliariumannittussarsiuunneqalerpoq.
Naalakkersuisut ullumi pingasunngornermi ataatsimiinnerminni aalajangerput, nunatta Danmarkimi umiarsualivissaanik toqqaanissamut suliariumannittussarsiuussinissaq aallartinneqassasoq, suliariumannittussarsiuussinerlu Esbjerg-imi, Århus-imi aamma Aalborg-imi umiarsualivinnit peqataaffigineqassaaq.
Aalborg-imi umiarsualivik ukiorpassuarni umiarsuarnut nunatsinnukartartunut aallaaviusimavoq, nassiussallu nunatsinnukartut nunatsinneersullu Aalborgikkoortarput.
Namminersornerullutik Oqartussat Aalborg-illu umiarsualiviata kiffartuussinissamik isumaqatigiissutaat aasaru atorunnaartussaavoq, tamannalu tunngavigalugu Aalborg-ip umiarsualiviata umiarsualivinnut allanut naleqqiulluni unammillersinnaassusia naliliiffigissallugu pissusissamisuuginnassasoq Naalakkersuisut naliliipput.
- Peqataaqqusilluni suliariumannittussarsiuussinissap ingerlanneqarnissaanut siunertarineqarpoq Kalaallit Nunaanni inuiaqatigiit aningaasaqarnerannut naleqqunnerpaamik toqqaanissap qulakkeerneqarnissaa, tassanilu ilaatigut pitsaassuseq akillu oqimaaqatigiisilluaqqissaassavagut. Sullitat nassiussalerinermilu sullissisut assigiinngitsut Naalakkersuisut aalajangernissaannut pitsaanerpaamik tunngavissiuussinissaq qulakkeerniarlugu pitsaasumik pilersitsiffiulluartumillu suleqatiginissaat qilanaaraara. Naalakkersuisut aalajangernissaannut tunngavissamik inaarutaasumik kingusinnerpaamik 2006-imi septembarimi saqqummiussinissara naatsorsuutigaara,” naalakkersuisunut ilaasortaq Jørgen Wæver Johansen ilisimatitsivoq.
