Nunatta Danmarki tapersersussaneraa suli aalajangerneqanngilaq
Sila pillugu Københavnimi ataatsimeersuarnissami, decembarimi pisussami, Nunatta Danmarki tapersersussaneraa suli aalajangerneqanngilaq. Naalakkersuisut siulittaasuata Kuupik Kleistip, Danmarkimilu silap pissusaanut ministerip Connie Hedegaardip ataatsimeeqatigiinnerat naammassimmat, tamanna paasinarsivoq.
Allattoq Louise M. Kleemann
Silap pissusaa pillugu nunat tamalaat isumaqatigiissutissaannut Nunarput ilanngutissanersoq oqaatigisinnaanngikkallarlugu, Kuupik Kleist oqarpoq.
-Ataatsimiinneq pitsaasuullunilu pissarsiffiulluarpoq, aamma tullissaani ataatsimiinnissamut isumalluarpunga, Naalakkersuisut siulittaasuat oqarpoq.
Illuatungeriit qaqugu naapeqqissanerlutik suli oqaatigisinnaanngilaat.
- Kisianni periarfissanik ujaasiuarpugut, Kuupik Kleist oqarpoq.
Naalakkersuisut siulittaasuata naalakkersuisoqarfiani immikkoortortami aqutsisoq Mininnguaq Kleist, ataatsimiinnermi aamma peqataavoq.