Nunatta CO2-imik aniatitsinera appartikkuminaannerarpaat

CO2-mik aniatitsinermik annikillisitsiniarluni suliniutissat annertupput, nalunaarusiamili Namminersornerullutik Oqartussat saqqummiussaat naammassineqaraluarpataluunniit, Kyotomi isumaqatigiissut naapertorlugu anguniakkat naammassineqarsinnaanngillat.

Pilersaarusiaq tusarniaassutigineqaleruttorpoq, anguniakkalli naammassineqassappata maannangaaq iliuuseqartoqartariaqarpoq.

Kyotomi isumaqatigiissut, Kalaallit Nunaannit aamma atsiorneqarsimasoq naapertorlugu, CO2 aniatitaq 1990-imut naleqqiullugu 2012 naatinnagu 8 procentinik annikillisinneqarsimassaaq.

Tamannali angujuminaassaaq, CO2-mi aniatitaq annikillisinneqarsimanngimmat, akerlianilli annertunerulersimalluni.

CO2 aniatinneqartoq 2012-iutinnagu 320.000 tonsiusariaqassaaq. Assersuusiussagutta tamanna nappartat uuliamik imallit 600.000-it missigaat.

CO2-mik aniatitsinermik annikillisaanikkut mingutsitsineq annikillisarneqarsinnaavoq, kiassarnermilu sipaarniutissaqaqisoq nalunaarusiami taakkartorneqarpoq.

Qaammarsaanerit, nukissiuuteqarnermi siunnersortit, nukissiuutinillu atuinermi nalunaarsukkat aqqutigalugit sipaarniuteqarfigineqartussat nassaariniarneqassapput.

Mingutsaaliuinissarli pillugu suliniutit tusarniaassutigineqareerpata, silallu pissusaanut atatillugu politikkimik naalakkersuisut saqqumiussigaluarpataluunniit, mingutsitsineq suli annertuallaassaaq.

CO2-mik aniatitsivallaarneq 2012 ilanngullugu annikillisarneqaraluarpalluunniit anguniagassat affaannaasa anguneqarsinnaanissaat ilimagineqarpoq. Tamanna nappartat uuliamik imallit 260.000-it missigaat.

CO2-mik immikkut ittumik aniatitsisinnaanissamik akuersissutinik pisisoqassanersoq, imaluunniit Kalaallit Nunaat immikkut ittumik isumaqatigiissusiussanersoq nalunarallarpoq, avatangiisinulli naalakkersuisoq Kim Kielsen Danmarkillu avatangiisinut ministeria Connie Hedegaard sapaatip-akunnerup tulliani ataatsimiissapput, tassanilu aalajangiisoqassagunarluni.