Nunatta biskoppia naalagiaqatigiinnermi pingaarutilittut inissisimavoq

Silap pissusaa pillugu naalagiarneq ullup qeqqata siorna Københavnimi oqaluffissaarsuarmi Københavns Domkirke-mi ingerlanneqartoq nunarsuarmit tamarmit pisunit peqataaffigineqarpoq.
Allattoq Jaaku Lyberth
decembarip 13-at 2009 13:13

Nunarsuatta siunissaa pillugu qinoqatigiittoqarpoq. Kalaallit Nunaata biskopia Sofie Petersen naalagiaqatigiinnermi pingaarutilittut inissisimavoq, oqaluusseqataagami, kingornalu erinarsoqatigiit Avaat erinarsorput, atorlugu Kristen Poulsenip erinarsuusiaa Ukiap Seqerna pukkilisoq. Sofie Petersen oqaluussinermini tuluit oqaasii atorlugit oqaluussivoq, ujaqqamik sernersuarmit pisumit tigummiarluni. Nunatta biskoppia Sofie Petersen naalagiaqatigiinnermi Sydafrikap biskoppia Desmond Tutu sanilerivaa, soorluttaaq taanna namminneq oqaatsini atorlugit oqaluffimmi oqaluussisoq.