Nunatta avataaniit tikisitsinissaq apeqquserneqarpoq
- Eqqaamaneqartariaqarpoq Aasianni suliffissuarmi sulisorpassuit sulerusungaaraluartut ullumininnguit periarfissillugit Royal Greenlandip soraarsimmagit.
Periaaseq taanna inuiaqatigiit suliffeqarfiutaata Royal Greenlandip sinerissami sulisuminut ukiorpassuarni atugarisimavaa, kommunenut, minnerunngitsumillu sulisunut, atugarliuutaasaqisumik, Ane Hansen allappoq, nangillunilu:
- Tamatuma qaavatigut Royal Greenlandip suliffissuarmini sulisartuusimasorpassuit qulaatiinnarlugit nunanit allanit sulisussaminnik tikisitsiniarluni maanna pilersaaruteqarpoq. Tamanna akueriinnarneqarsinnaanngilaq. Sunami nunatsinni kommuninit allanit suliartortut avataaniillu tikisinniakkat pisariaqartitaasa allaanerussutigaat? Tamarmik ineqartusssaapput, aamma tamarmik ilaquttamik tungaasigut assigiinngitsunik pisariaqartitsisussaapput, Ane Hansen allappoq. Taassuma kommunit Ilulissat qanittuaniittut suleqatigalugit Royal Greenlandip Ilulissani suliffissuata sulisussarsissunneqarsinnaanissaa ujartorlugu.
