Nunatta avannaani kiassuarsiorneq
Aasianniit Qaanaap tungaanut nalinginnaasumik arfinilinnik juulip qaammataani kiattaraluartoq, agguaqatigiissillugu 9,3-mik kiassimavoq. Juunimi aamma kiassimaqaaq.
Sermeq maanna uuttortarniarneqalerpoq, sermip aakkiartornera qanoq annertusimatiginersoq taamaalilluni paasineqarsinnaanersoq misilinniarlugu, silap pissusaa pillugu qallunaaq ilisimatooq, Sebastian Mernild, USA-mi Los Alamos Universitetimeersoq, nassuiaavoq.
Sisimiuniit kujammut Nunap Isuata tungaanut qanoq kiatsigisimanersoq Immat Sikulu pillugit silasiorfiup DMI-p immikkoortortaa suleqatigalugu Pinngortitaleriffimmiit arlaleriarlutik aamma misissuisimapput.
Immani itisoorsuarni tarajoqarluartoq, taamaammallu tamaani kissarnerusoq, paasineqartoq, DMI-mit ilisimatitsipput.
- Sarfaq kissartoq Kitaata kujataani immamut kissamik mannamut suli pilersuiuartoq tamassuma ersersippaa. Tamanna aalisakkat piujuaannarnissaannut kisimi sunniuteqarneq ajorpoq, ilisimatusarnerilli kingulliit ersersippaat, Nunatsinni sermit immap naqqani kissamit sunnerneqartartut, Mads Hvid Ribergaard DMI-p nittartagaani allappoq.
Upernaaq misissuisarnerniit paasissutissat immap pissusaata allanngorarneranut Nunatsinnilu aalisakkat amerlassusaannut qanoq sunniuteqartarnerat Pinngortitaleriffiup paasiniaanermini atorluaqai.