Nunatta avammut nittarsaannera isumalluarfigineqarpoq
Amerikap nunattalu akornanni toqqaannartumik timmisartukkut attaveqalerneq nunatta avammut nittarsaanneqarneranut tunisassiorsinnaanermullu isumalluarnatoqarpoq, taamatut oqarpoq suleqatigiiffiup Branding Greenland-ip siulittaasua Louise Lee Leth Namminersornerullutik Oqartussat Nunanut allanut pisortaqarfiani fuldmægtigi.
Washington-imi danskit aallartitaqarfiani nalliuttorsiualaarnermi inuit naatsorsuutigisamit amerlanerusimapput.
Avataaniit tunisassiassanik Amerikamut tuniniiaasinnaaneq ilungersunarsinnaavoq, neriuutigineqarpulli nunatsinniit umimmaat tuttullu neqaannik tuniniaasoqalersinnaassasoq. Louise Lee Leth isumaqarpoq, USA-mi naalagaaffiit illoqarfiillu ataasiakkaat imaluunniit nunap immikkoortui tunisassiorfiginiarlugit aallartisartoqarsinnaavoq.
Siullermeerluta takoqqusaarnerput ajunngitsutut nalilersinnaavara, naatsorsuutigisatsinnit inuit amerlasuut aggersimapput tamannalu ajunngitsutut takussutissaavoq Louise Lee Leth oqarpoq. USA tunisassiorferujussuuvoq, tamannalu pillugu illoqarfiit naalagaaffiillu ataasiakkaat tunisassianik ataasiakkaanik tunisassiorfigalugit aallartittoqarsinnaavoq, sulilu mississugassaqarpoq.
Maannakkut Air Greenland-ip USA-mut timmisartuussisalerneratigut takornariaqarneq aallupparput, kalaallit neqaataannik soorlu umimmaat tuttullu neqaannik USA-mut tunisassiorsinnaalernissaq eqqarsaatinut ilaapput Louise Lee Leth oqarpoq, timmisartoq siulleq Kalaallit Nunaata USA-llu akornanni ingerlaarlluni aallartippoq sulilu siuliassaqarpoq.
Louise Lee Leth Baltimore-p mittarfiani Air Greenland-ip timmisartua Kunuunnguaq siullermeerluni nunatsinnukangajalersoq suleqatitta Jaaku Lyberth-ip oqaloqatigaa.
Branding Greenland, Namminersornerullutik Oqartussat ataani suleqatigiiffiuvoq, suleqataapput Air Greenland, Royal Greenland KNI aammalu Kalaallit Nunaani takornariaqarnikkut inuussutissarsiutitigullu siunnersuisoqatigiiffik.
