Nunatta assiliornerani Korea Kujalleq ikiuutissaaq
Nunatta ataatsimeersuarnermi pissarsiarisaata ilagaat Korea Kujalliup nunatta assiliorneranut ikiuussinnermik neqerooruteqarnerat. Koreamiut 3D atorlugu sukumiilluinnartumik nunap assiliorneqarnissaanik neqeruuruteqarput, Nunatsinni suliffissuaqarnikkut siunissami iluaqutaalluarsinnaasoq.
-Korea Kujalliup Nunatsinni nunap assiliorneqarneranut peqataarusulluni neqeoorutaa pitsaalluinnarpoq. Tamattami nalunngilarput Nunatsinni nunap assiliorneqarneri pisoqalisimasut eqqoqqissaanngitsullu. Nunap assingi amigaatillit suliffissaqarnikkut ineriartortitsinissamut ullumi akornutaapput, kangerlunnilu angalanermut qaqqanilu pisuttuarnermut nalornisitsisarlutik, Siverth K. Heilmann nassuiaavoq.
Naalakkersuisutigootumik ataatsimeeqatigiinnerit saniatigut aamma atorfilittatigoortumik ataatsimiinnerit arlallit ingerlanneqarput, atorfilittallu Nunatsinneersut nunap assiliorneqarneranut ilisimasanik pissarsipput, Korea Kujallermi nunarsuarmi tamakkuninnga suliaqatut pikkorinnersaat ilagivaat.