Nunatta aningaasassai misissoqqissaarneqaqqaassapput

Folketingimut ilaasortap IA-meersup Kuupik Kleistip paasisinnaalluarpaa Folketingimi aalajangerneqarmat nunatta aningaasassai pillugit siunnersuut misissoqqissaarneqassasoq.

- Tamatumunnga nunatta aningaasaqalerusunnginnera imaluunniit Inatsisartuni partit siunnersuummut isumaqataannginnerat patsisaanngillat, folketingimut ilaasortaq erseqqissaavoq.

Kuupik Kleistip aningaasat nunatta avataani naalagaaffeqatigiinnerup iluani atorneqarsinnaanerisa misissorneqartariaqarnerat pingaarnerusutut isigaa.

- Isumaqarpunga isumatusaarnerusoq aningaasat nunatta avataani atorneqarsinnaanissaasa misissorneqarnissaat aalajangiunneqarmat, Kuupik Kleist oqarpoq.

Siunnersuutip ullumi aappassaaneerlugu oqaluuserineqarnerani Dansk Folkepartimit kissaatigineqarpoq siunnersuut nunatsinni pissutsit pillugit ataatsimiititaliami oqaluusereqqinneqassasoq.

Dansk Folkepartimit tamatumunnga tunngavilersuutigineqarluni, siullermik nunatta aningaasaqalernissaanik kissaateqarneq ministeriunerup kissaatigisarimmagu, nunatta kissaatigisamisut saqqummiussimanngisaa.

Aappassaanik Inatsisartut apeqqummut marlunngorlutik avissimammata, tassami Atassut aamma Demokraatit akerliullutik taasisimammata. Kiisalu pingajussaanik aningaasat nunatsinneersunik assiliartallit Danmarkimi atorneqarsinnaannginnerat eqqumiigineqarmat, naak danskit aningaasaasut naleqartigissagaluartut.

Tunngavilersuutit tamakkua IA-p Folketingimut ilaasortaatitaata tapersersorpai.