Nunatta aningaasarsiorsinnaanissaraluanut akornutaasinnaasoraa

-Ujarlerluni qillerinissanut pilersaarutit kinguaattoorpallaassappata taava soorunami taanna sunniuteqaratarsinnaavoq, soorlu nunatta aatsitassarsiorfittut uuliasiorfittullu pilerigineqarneranut aammalu uuliamik ujarlerlutik ingerlatsisut taakkua aningaasartuutaasa qaffarujussuarnerannik kinguneqarsinnaalluni, taamaalillunilu aamma inuiaqatigiit kalaallit aningaasanik pissarsiassaannut ilanngartuutaalluni, Kuupik Kleist oqarpoq.

Greenpeacekkut nunatsinnut aatsaat innimiillisaalinngillat, tamannalu naalakkersuisunit kinguneqartinneqassanersoq aperigatsinni Kuupik Kleist akivoq:

- Tassami takornartaanngilaq aamma pingaartumik nunatsinni Greenpeacep nammineq allanit tamanit qaffasinnerusutut inissinnera, aammalu nunatsinni naalakkersuinikkut aqutsineq saneqqutiinnarlugu imminut naalaganngortinnera inuiaqatigiit ineriartornerannut aamma aningaasarsiornerannut aamma akornutaasumik. Kisianni tassunga tunngasumik massakkorpiaq inatsisit naapertorlugit suliassaq ingerlanneqartoq oqareernittuut malinnaaffigaarput, kisianni arlaatigut pisariaqartinneqassappat soorunami uagut iliuuseqarnissamut piareersimavugut, erseqqissaavoq.

Massakkulli iliuusissat suuneri oqaatigisinnaanngilai. Cairn Energy misileraalluni ukiaanerani qillerinissamut akuersissutaata sivitsorneqarnissaa aamma ilimaginngilaa.

- Sivitsuinissaq eqqarsaatiginngilarput. Uagutsinnut pingaaruteqartorujussuuvoq isumannaallisaanermut malittarisassat aamma piffissaliussat malinneqarnissaat. Sivitsuinissamik eqqarsaateqanngilagut, Kuupik Kleist naggasiivoq.

Naalakkersuisut siulittaasuat Kuupik Kleist Virna Fenckerimit apersorneqarpoq.