Aningaaserivik: Nunatta aningaasaqarnera pitsanngoriartorpoq

Biilit nutaat 321-t aqqusinerni ukioq kingulleq ingerlaalersimapput. Tamanna kisitsisini nutaani Nunatta Naatsorsueqqissaartarfiata saqqummiussaani takuneqarsinnaavoq.

Biilit amerleriangaatsiarsimaneri GrønlandsBankenip tupaallaatiginngilai. Innuttaasummi biilinik nutaanik piserusunnerulersimapput, ataatsimullu isigalugu innuttaasut aningaasaateqarnerulersimapput. GrønlandsBankenimi sullissisunut pisortaq, Peter Petersen, KNR-imut ilisimatitsivoq.

- Biiliserusullutik taarsigassarsiniartut amerleriangaatsiarnerat malugaarput. Tamanna qularutissaanngilaq. 
Biiliinnaanngitsunilli aamma inimik piserusuttut amerlisimasut. Peter Petersen oqarpoq.

- Sineriammi tamani taamaappoq. Illoqarfinni assigiinngitsuni immikkoortortaqarfiit tikikkaangatsigit tamanna malugisarparput, Peter Petersen oqarpoq.

Petersenip taamaattoqarnera inuiaqatigiinni suliassaqarluartoqarneranik ilaatigut pissutissaqarsoraa.

- Suliffissarsiortut ikiliartorput suliassaqarnerulerlunilu. Innuttaasut isumalluarnerupput siunissamullu biilisinikkut inisinikkulluunniit aningaasaliinissamut sapiissuseqarnerullutik.

- Sanaartortoqarpoq, aalisarnerup iluani akigissaartoqarlunilu ingerlalluartoqarpoq. Kinguneranik piffissaq tamakkerlugu sulisoqarnerulerpoq isertitaqarnerusoqalerlunilu, Peter Petersen GrønlandsBankenimi sullissisunut pisortaq taama oqarpoq. 

Nunatta aningaasaqarnera pitsanngoriartortoq, Peter Petersen oqarpoq. 

Tamannalu suliffissaqartitsinerulernermik kinguneqarsinnaasoq oqaatigalugu. Assersuutigalugu innuttaasut biilisinerulernerisigut suliffissanik nutaanik pilersitsisoqarsinnaasoq.

AAMMA ATUARUK Biilit avatangiisinut mingutsitsinnginnerusut nuannarineqartut