Nunatta aningaasaqarnera nalunaaquttap akunnerni tallimani oqallisigaat

Tassami naak nunatta aningasaqarnikkut inissisimanerata pitsaanerulersinnissaanut iliuuseqarnissaq pisariaqartoq, partiit tamarmik isumaqatigiissutigigaluaraat, iliusissat suut pisariaqarnersut iluarsaaqqinnissallu qanoq  isikkoqassanersut assigiinngitsunik isumaqarfigineqarput.

Inuit Ataqatigiinnit ingammik siusinaartumik pensionit iluasaateqqinnissaannut Naalakkersuisut siunnersuutaat nikussaarutigineqarput.

Naaja H. Nathanielsen Aqqaluaq B. Egedelu isumaqarput, siusinaartumik pesionisianik iluarsaaqqinnikkut suliffeqareersut suliffissaarutsinneqassasut, taamaammallu maanna suliffissaaleqereertut suliffissaqalersinnissaat isumagineqaqqaartariartoq.

Aamma Namminersorlutik Oqartussat sillimmasiisarnerisigut 32,5 millioner koruunit tungaannut nunatta avataanut nassiunneqartartut, Partii Naleqqap tikkuarpaa.

Aningaasat takkua nunatsinniiginnartariaqaraluartut, Partii Naleraq isumaqarpoq.

Namminersorlutik Oqartussat suliffeqarfiutimik sillimmasernissaannut aningaasat qassit atortarneraat, partiip taassuma §37 atorlugu siusinnerusukkut apeqqutigisimavaa.

Tamannalu tunuliaqutaralugu Inatsisartuni siunnersuutigineqarpoq, kommunit, Namminersorlutik Oqartussat piginneqatigiiffiutaat aamma Namminersorlutik Oqartussat ileqqaaruteqarumallutik suleqatigiillutik sillimmaseeqatigiissasut.

Siunnersuut taanna aningaasaqarnermut naalakkersuisup, Andreas Uldumip, akuersaarnarteqaa, oqaluttuarporlu Naalakkersuisut tamanna misissulereeraat, aningasarpassuit sipaarneqarsinnaanerat peqqutigalugu.

Ilinniartitaaneq salliutinneqassasoq partiit tamarmik tapersersorpaat. IA-li isumaqarpoq, Naalakkersuisut ilinniartitaanermut politikkiat imminut ataqatigiinngitsoq, Naalakkersuisut ilinniartitaanermik pingaartitsiutigalutik , aamma ilinniartut inaanik sanaartornermut sipaarnissamik siunnersuuteqarmata.

Andreas Uldum nassuiaavoq tamatumunnga pissutaasoq, Naalakkersuisut ilinniartut inaanik sanaartornissaq aalluunnerusimasinnarlugu maanna unikaallatitsimmata.

Aamma suliffiit nunatsinniittut nunaqavissunit suliffigineqassasut partiit tamarmik isumaqatigiissutigaat. Siumut ingerlaqqilluni oqarpoq, Pituffimmut tungasut nunatsinnut nuuneqartariaqartoq. Apeqqulli taanna Pituffik pillugu oqallinnissami aatsaat oqaaseqarfiginiarlugu, Andreas Uldum oqarpoq.