Nunatta Ammeriviata namminersortunngornissaa misissuiffigineqarallassaaq
Nunatta Ammeriviata namminersortunit ingerlanneqalernissaa pillugu misissuineq suli piffissami sivisuumi ingerlanneqassasoq natsorsuutigineqartoq, Namminersornerullutik oqartussani suliaq pillugu ilisimasalik Kasper Juul Nielsen oqarpoq.
Nunatta Ammerivia nunarput tamakkerlugu sullissisuugami pisussaaffippassuaqartoq oqaatigineqarpoq, soorlu piniartut puisit ameerniartarnerannut tunngasumik kiffartuussinissamik isumaqatigiissuteqarpoq.
Taamaammat suli misissugassaqaqimmat qanoq ingerlariaqqittoqarnissaa pillugu Naalakkersuisut aqagu eqqartuissasut, Namminersornerullutik oqartussaniit ullumi ilisimatitsissutigineqarpoq.
Nunatta Ammeriviata siunissaa pillugu ataatsimiititaliamik suligasuartussamik pilersitsisoqarnissaa eqqarsaatigineqarpoq, ataatsimiititaliami tassani susassaqartut tamarmik, soorlu nunatsinni aalisartut piniartullu kattuffiat susassaqartullu allat ilaasortaassapput.
Taamaattumik Nunatta Ammerivia siunissami qanoq ingerlanneqalissanersoq ukiup affaata missaa qaangiuppat aatsaat paasinarsissasoq naatsorsuutigineqalerpoq.