Nunatta Ammerivia Nunatsinni tuniniaanerluttutut uparuarpaat

- Nunatsinniipput ammit ajornerpaartaat. Tuniniartarpaat pisiniarfinnut, puisit amii panertorsuit allaat alittortartut, Ilulissani imissutinik mersortartoq Iluna Johansen oqarpoq. Nunanilu allani kaattaassinerni ammit akikitsumik tuniniarneqartartut pitsaassusii paaserusuppai.

Ammit pitsaassutsinut A, B, C, D imaluunniit E-nut nalunaaqqutserneqartarput, ammit pitsaanerit A-mik nalunaaqqutserneqartarlutik. Akikitsuinnaanngillalli.

- Taanna pitsaassuseq A nunatsinni tuniniarneqartarpoq 1.696 krone. A, B-it akisungaarmata piniarfiarfinni allani nioqqutigineq ajorpaat. Taamaallaat C, D, E-t, ajornerpaat. ¨

Taakkumi qanoq akilersorneqartarpat?

Soorlu natsiup amii Pisiffiup pequtaarniarfiani tuniniarneqartarput 400 krone, natsiup ameeranngua.

Taava C-it allattuuaqqap amii, aataannguit amii, 7-800 kronenik akeqartarput turistilerisuni taavalu pisiniarfinni allani, Iluna Johansen oqarpoq.

Great Greenlandip nunani allani kaattaasinerni puisit amiinik 700-nik agguaqatigiisillugu 275 kronelerlugit tunisaqaqqammerpoq. Iluna Johansenimit tamanna eqqarsarnartoqartinneqarpoq, tunineqarnerilu akikinaarpai.

- assorujuk tupappunga, ilaa pitsaassutsimmita suut tuniniartarpaat, eqqarsarpunga qamuuna.

Qeqertarsuarmi pisisartut Great Greenlandip amiutaanik niuertarfinni pisiassaqanngillat. Qeqertarsuarmiup Ane Dahlip nunani allani kaattaassinerni akigitinneqartut nunatsinnit pisisartunit unammillerneqarluarsinnaasorai, nunatsinnilu amminik tuniniaaneq pitsaanerusinnaasoralugu.

- 275 kroneliinnarlugu pisiarisinnaappassuk nunatta avataani, sooq taava uagut nunaqavissut amermik pisisinnaanngilagut 400 imaluunniit 500 kronelerlugu, imaluunniit akikinnerulaartumik? Kisianni taanna 275 krone nunatsinni unammillerneqarsinnaasutut isigaara, Ane Dahl oqarpoq.

Iluna Johansen aamma Ane Dahl isumaqarput Great Greenland A/S puisit amiinik nunatsinni pitsaanerusumik tuniniaasinnaasut.