Nunatta aatsitassai Torontomi neqeroorutigineqarput
Canadami Torontomi aqagu ullaakkut nunarsuarmi aatsitassat pillugit saqqummersitsinersuit annersaat ammarneqassaaq.
Saqqummersitsinersuarmi aningaasaliisussanik ujartuilluni unammillerneq annertuvoq, taamaalilluni aamma Aatsitassanut Ikummatissanullu Pisortaqarfik nunatsinni kuultisiorsinnaanermik diamantisiorsinnaanermillu aningaasaliisussarsiornermi unammillertunut peqataavoq.
Aatsitassanut Ikummatissanullu Pisortaqarfimmi ujarassiooq Lars lund Sørensen oqarpoq Nunatta saqqummersitsinersuarmi peqataanera pingaaruteqarluinnartoq:
-Kalaallit Nunaata aatsitassatigut tunisassiaralugit neqeqeroorutigisinnaasai nunarsuarmioqatitsinnut saqqummiukkumallugit maani peqataavugut, peqataanerpullu pingaaruteqarluinnarpoq unammillernermi annertuvoq; peqataangikkuttami piginneqatigiiffiit Kalaallit Nunaanni aatsitassarsiorsinnaanermut periarfissarititavut ilisimalernavianngilaat, Lars Lund Sørensen oqarpoq.
Lars Lund Sørensen oqarpoq ukiut tamaasa peqataasarlutik aammalu peqataasarnermikkut nunani allamiut nunatsinni aatsitassarsiorsinnaanermut qinnuteqartarnerisigut ersertoq saqqummersitsinersuarnut peqataasarnerit iluaqutaasut.
- Natsorsoruminaappoq peqataasarnerput qanoq annertutigisumik kinguneqartarnersoq, kisianni piginneqatigiiffiit Kalaallit Nunaanni aatsitassarsiorsinnaanermut qinnuteqartartut maani saqqummersitsinermi peqataasarput allallu aamma nutaat aatsitassarsiorsinnaanissamut qinnuteqarnissaat maaneereernitta kingorna ilimanaateqarsinnaavoq, Lars Lund Sørensen oqarpoq, nangillunilu:- Kalaallit Nunaanni aatsitassarsiornikkut misissuinerit 1998–miit aatsaat taama amerlatigimmata aatsitassanillu nassaartarnerit amerlammata, aammalumi Tunumi saviminissamik aatsitassarsiorfissaq nunatsinni aatsitassarsiorfiit pingajorilersinnaanerat periarfissaqarmat, ilimanarsinnaalluarpoq maani peqataanerput kinguneqarluassasoq; Lars Lund Sørensen oqarpoq.
Aatsitassanut Ikummatissanullu Pisortaqarfimmiit peqataasoqarnerata saniatigut aamma peqataapput: Nuna Minerals, Greenland Ressourses aamma Air Greenland.
