Nunatsinnut umiarsuarnik takornariartitsisarneq nunarsuatsinni annersaassaaq
Takornariap ataatsip umiarsuarmut ilaannerminut akitsuutitut akiliutigisartagai, 525 koruuniusut, nunattalu karsianut maanna nakkartartut, takornariartitsinerup siuariarneranut atorneqartaruaqartut, peqatigiiffik nutaaq isumaqarpoq.
- Aningaasat akitsuutitut akiliutigineqartartut, nunatta karsianut nakkartinneqartartut iluamik atorluassagaanni allatut eqqarsartoqartariaqarpoq, peqatigiiffiup nutaap, Cruise Greenland Associationip siulittaasua, Therese Kreutzmann, oqarpoq:
- Aningaasat nunatta karsianut nakkartinneqartartut ilaannaalluunniit atorsinnaagutsigit, taava ilaasut niuffigisinnaasaannut iluarsartuussinernut aammalu piginnaanngorsaanerup siuarsarneqarneranut atortarsinnaassagaluarpagut. Taamaaliornerup kingunerissavaa takornarianut atugassarititaasut pitsanngornerat, ullumikkummi atugassarititaasut naammaginanngilluinnarmata, siulittaasoq Nuuk Tourism-imi pisortaq, Therese Kreutzmann oqarpoq.
Umiarsuit takornariartaatit 44-t siorna 2010-mi 30.000-nik ilaasoqarlutik nunatsinnut tikipput, akitsuutinik akiliinermikkut nunatta karsia 15 million koruuninik iluanaartillugu.
Aningaasat taakku takornariaqarnerup siuarsarneranut atorneqartarnersut, Cruise Greenland Asssociationip takusinnaanngilaa, taamaattumillu aningaasat ilaannaalluunniit siuarsaanermut atorneqartalernissaat siunnersuutigissamaalerlugu.
- Umiarsuit 3000-nik ilaasullit illoqarfinnut tikikkaangata, niuniarnerinnaannulluunniit talittarfeeqqanik sanaartornermut aningaasat atorneqartartuuppata iluaqutaakutsuussagaluarpoq, tassami umiarsuit nunatsinnut tikittartut alligaluttuinnarput atugassarititaasulli pitsanngortinneqassanatik. Taamaattumik maanna pisariaqalerpoq oqaluuserissallutigu aningaasat nunatta karsianut nakkartartut qanoq atorluarneqarsinnaanersut, Therese Kreutzmann oqarpoq.
Umiarsuit tikinneranni pitsanngorsaatit mikisunnguilluunniit nunatta aningaasarsiorneranut iluaqutaasinnaakutsooraluartut, Therese Kreutzmann isumaqarpoq:
- Aaqqiinerit annikitsunnguilluunniit, soorlu nunaqarfiit amerlanerit tikinneqarsinnaanngornissaannik suliniarneq aallarniutaasinnaavoq - nunaqarfinnut tikinneqartalersuni najugaqartunik aasap ingerlanerani aamma aningaasarsiorfissaqalersitsisinnaasoq, Therese Kreutzmann oqarpoq.
Cruise Greenland Association suliffeqarfinnit aamma takornariaqarnermik suliaqartunik ilaasortaqarpoq. Peqatigiiffik nuna tamakkerlugu umiarsuarnik takornariartitsisarneq pillugu Nuummi kingullermik isumasioqatigiinnermi pilersinneqarpoq.
