Nunatsinnut ulloq manna nuannaarutissaavoq angisooq
Nunatsinniit folketingimut ilaasortaatitat, Juliane Henningsen aamma Lars-Emil Johansen folketingimi ataatsimiinnerup naammassinerani nuannaarlutillu tulluusimaaqaat.
- Kalaallit angernerat erseqqilluinnartumik uagutsinnut takussutissaavoq Nunarput suli nammineernerulernissaminut akisussaanerulernissamullu piareersimasoq. Naatsumik oqaatigalugu maani inersuarmi ataatsimiittugut Kalaallit Nunaata Namminersornermut Inatsisissaa pimoorullugu suliareqquneqarpoq. Maannakkut Nunatsinnut akisussaaffik tigoqqilerparput, tamannalu annertuumik uagutsinnut politikkeriusunut piumasaqaateqarpoq, Juliane Henningsen ilaatigut oqalugiaammini taama oqarpoq.
Lars-Emil Johansenip oqalugiaammini aallarniutigalugu ulloq manna Nunatsinnut pingaartorujussuartut taavaa.
- Inatsisissatut siunnersuut amerlanerussuteqarluartunit tapersersorneqarpoq tamannalu uagut nunatta pisuussutaanik piginnittussaalernitsinnik inuiattullu nunami namminersulivissinnaanissatsinnut ammaassinermut takussutissaavoq. Tamannalu tunngavigalugu nunaqqatinnut inuusuttunut oqarusuppunga: Ak! takanna, aajuna kiffaanngissusermut akisussaasusermullu matuersaatissarsi. Eqqaamallugu siunissami sorsuutissat ingerlanniartillugit immissinnut asaqatigiinnissarsi puigussannginnassiuk aamma puigoqinagu asanninneq kalaallit qallunaallu akornanniittoq. Ilaatigut taamatut Lars-Emil Johansen oqalugiaammini oqarpoq.
