Nunatsinnut tunngasut ilisimatusarnerit amerliartorput
Nunatsinnut tunngassuteqartunik ilisimatusarnerit amerliartorput, ilisimatusarnerit nunatsinni ingerlanneqartut amerlanerullutik. Taama nunatsinnut tunngassuteqartunik 2003-mi 2004-milu ilisimatusarnerit naatsorsorneqarnerini Dansk Center for Forskningsanalyse-p ullumi saqqummersitaani takuneqarsinnaavoq.
Nunatsinni ilinniarfeqarfiit inuussutissarsiornerullu iluani ilisimatusarnerit ukiuni makkunani amerliartorput, taamatuttaaq Danmarkimi ilisimatusarfiit ilisimatuutullu misissuisarfiit nunatsinni ilisimatusarnerat annikitsuinnaagaluartumik amerliartorlutik. Ilisimatusarneq ineriartortitsinerlu 2002-miit 2004-mut 23 procentimik qaffassimapput 194 millioni koruuninik naleqalerlutik.
Ilisimatusarnerit nunatsinni ingerlanneqartut 1995-mi 15 procentiusut 2004-mi 36 procentimut qaffassimapput. Danmarkimi nunatsinnut tunngassuteqartunik ilisimatusarnerit nunatsinnitut amerlatigisimapput, ilisimatusarnerilli 2004-mi nunatsinni ingerlanneqartut, 1995-mut naleqqiullugit 50 procentimik ikileriarsimallutik.
Ilisimatusarfigineqartut eqqarsaatigalugit 1995-imiit malunnaatilimmik nikeriartoqarsimavoq. Pinngortitalerinermut tunngasuni ilisimatusarnerit 1995-imi 83 procentiusimagaluartut, aningaasaliinerilli amerliartunnginneri pissutigalugit 2002-mi ilisimatusarnerit ikileriarujussuaraluarput, 35 millioni koruuninilli aningaasaliisoqarnerata kingunerisaanik ilisimatusarnerit 1995-imituulli amerlatigileqqissimallutik.
Qaasuitsumi Teknologiimik Inerisaavik Sisimiuniittoq pilersinneqarmat teknikkimut tunngasuni ilisimatusarnerit amerleriarujussuarsimagaluarput, maannali 90-ikkunnituulli amerlatigileqqissimallutik.
Inuiaqatigiilerinermi ilisimatusarnerit 2002-miit 2004-mut affaannanngorsimapput, silaqassutsikkullu pilersitanik ilisimatusarnerit, tassa humanistiskinik ilisimatusarnerit pingajorarterutaannanngorsimallutik.
Taamaalilluni teknikkimut tunngassuteqanngitsunik ilisimatusarnerit 2000-mi 45 procentiusimagaluartut 2004-mi 31 procentiinnanngorsimapput.
Dansk Center for Forskningsanalyse-p Namminersornerullutik Oqartussani Kultureqarnermut, Ilinniartitaanermut, Ilisimatusarnermut, Ilageeqarnermullu Pisortaqarfik, Dansk Polarcenter-ilu suleqatigalugit naatsorsueqqissaarnerit ingerlappaat.
