Nunatsinnut tunngassuteqartut ministerit nutaat assaanniilerput
Nunanut allanut ministeri
Nunanut allanut miniseriusimasup, Lene Espersenip ministerqarfini Villy Søvndalimut akisussaaffigitileramiuk ima siunnersuuteqarpoq:
- Nunat Issittut pillugit ataasiinnarmik siunnersuutissaqarpunga, tassalu nunat taakku pillugit eqeersimaarlutit sulinissat siunnersuutigissavara, Lene Espersen Villy Sønvdalimut oqarpoq.
Villy Søvndalip maanna akisussaaffiisa ilagilerpai, Issittumi Siunnersuisoqatigiit aammalu Arctic Five-ip ataatsimiinneranni peqataasarnissani.
Ilageeqarnermut aamma Nunat Avannarlernut ministeri
Danmarkimi Ilageeqarnermut, Naligiisitaanermut aamma Nunat Avannarlernut tunngasunut ministerinngorpoq, 44-nik ukiulik Radikale Venstreneersoq, Manu Sareen. Taassuma ilaatigut ilinniagaraa, aaqqiangiinngittoqartillugu isumaqatigiissiniartartuuneq. Nunarput pillugu Manu Sareenip pisinnaasani atorluarsinnaassagunarpaa, tassami ungasinngitsukkut taassuma aalajangigassaraa, ilagiit kalaallit Danmarkimiittut kalaallimik palaseqatinneqarnissaasa aningaasalersorneqarnissaa imaluunniit aningaasalersorneqannginnissaa.
Ineqartitsineq pillugu ministeri
Kalaallit pinerlussimasut Herstedvesterimi parnaarussaasarunnaarlutik Nuummi parnaarussivimmut matoqqasumut nutaassamut inissinneqartalernissaat, Socialdemokraatit Inatsiseqarneq pillugu ministerertaavata, Morten Bødskovip isumagisussanngussavaa aammalu Eqqartuussiveqaneq pillugu Nunatsinni iluarsartuusseqqinneq taassuma ingerlateqqittussaassavaa. Minnerunngitsumillu kalaallinik eqqartussisoqartillugu eqqartuussissutit kalaallisut allassimasarnissaasa sulissutigineqarnera taassuma ingerlateqqitassaraa.
Illersornissaq pillugu ministeri
Issittumi Sakkutooqarfissap piviusunngortinnissaa Socialdemokraatimit, Nick Hækkerupimit akisussaaffigineqalissaaq, tassami taanna Illersornissaq pillugu ministerinngorami. Nick Hækkerupip aamma suliassaannut oqimaatsunut ilaassaaq, Issittoq pillugu pilersaarummi siunniunneqarsimasut ilaat, tassalu issittup imartaani umiarsuartigut angallannermi isumannaallisaanissap pitsaanerusup anguniarneqarnissaa.
Iliuusissatut aningaasaliissutit
Kalaallit Danmarkimiittut inuuniarnikkut ajornartorsiortut pillugit, taakkununnga iliuusissatut aningaasaliissutaasussat eqqartorneqaqisullu Karen Hækkerupimit oqartussaaffigineqalissapput. Aammalu Danmarkimi Kalaallit Illuutaasa aningaasalersorneqarnissaat folketingimut qineqqusaarnerup nalaani Socialdemokraatinit qineqqusaarutigineqarput, neriorsuillutik piffissaq ungasinnerusoq isigalugu illuutit aningaasalersorneqartalissasut. Tamassuminnga neriorsuineq piviusunngussasoq taamaallaat pissanngatigiinnarsinnaavarput.