Nunatsinnut takoqqusaarut pitsassuaq
- Aningaasatigut iseritaqarfiunngikkaluarpalluunniit Kalaallit Nunaannik takutitsilluarneruvoq, taama oqarpoq Mads Nordlund Takornariaqarnermut Inuussutissarsiutinullu siunnersuisoqatigiini nittarsaassinermut ataqatigiissaarisoq.
- Pilerisaarut takoqqusaarullu pitsaanerpaaq allatut nalilerneqarsinnaanngilaq. Kikkut tamarmik tupaallaatigigunarpaat Julie Allstarsikkut taamak pikkoritsiginerat. Minnerunngitsumik nuannaarnerat, kissalaassusaat avammut siammartutullusooq ittarpoq, Mads Nordlund oqarpoq.
Kalaallit Allstarsimi peqataanerat nunarsuarmi arsamik pissartanngorniunnermut assersuunneqarsinnaasoq, Mads Nordlund isumaqarpoq.
Juliakkut takutitsilluarnerat Kalaallit Nunaannik isiginninnermik allanngueqataasinnaasoq, inooqatigiinnerup ingerlaasianik ilisimatooq Henrik Byager naliliivoq.
- Uanga paasinninnera malillugu kalaallit Allstarsimi peqataanerat Kalaallit Nunaata tusaamaneqarneranut pitsannguallataasinnaavoq, tassami Kalaallit Nunaata ajortortai Danmarkimi tusagassiuutitigut sammineqartut akuttunngitsumik tusartarpavut. Unalu tv-kkut qallunaarpassuit malinnaafigaat, kalaallillu taamatut saqqummernerat avammut kusanartumik kiinnernermut assersuunneqarsinnaavoq, Henrik Byager oqarpoq.
Qallunaat 800.000-it missaat tallimanngornerit siuliini tv-kkut isiginnaartarput.
