Nunatsinnut nunasisut saqqummersitsinermi oqaluttuarineqarput

Henrik Saxgren Kalaallit Nunaanni nunanilu avannarlerni inuiaqatigiit pissusaannik misissuiitigaluni nunasisimasunik 2002-mi apersuisaqattaarpoq assileeqattaarlunilu. Suliai Nuummi Katuami maanna saqqummersinneqalerput.

Assileqattaarsimasani allassimasanilu atsersimavaa “Sorsunneq Asanninnerlu”.

Assilineqarsimasut ilagaat Japanimiu Ikuo Siorapalummi ukiorpassuarni najugaqartoq, maannalu piniartunngorsimasoq, naak Japanimi ilinniagartuugaluarluni.

Assit akornganni ilaavoq, Italiamiu Silver maanna Ilulissani najugaqartoq, aamma Sudanimeersoq Muhammed Ali, maanna Sisimiuni nakorsatut atorfeqartoq.

- Uku inuit assilinikuusakka, tamarmik ataatsimik siunertaqarlutik Kalaallit Nunaannut nuupput. Tassa, siunertarisimagaluarpaat ukiut amerlanngitsut taamaallaat Kalaallit Nunaaniinissartik. Kisiannili pinngortitamut nuannarinninnertik pissutigalugu, nunaminnut uteqqinngillat. Kalaallit Nunaannullu nunasivillutik, Henrik Saxgren oqarpoq.

Henrik Saxgrenip ilanngullugu aamma oqatigaa, siumungaaq inuk kinaanersoq nalullugu, nalilersuisarneq peqqinnanngitsoq.

- Assilisimasakka, Kalaallit Nunaannut nunasisuupput. Eqqarsarnartoqarsinnaavoq, uku inuit qanoq oqaluttuassartaqarpat? Oqaannartoqarsinnaanngilarmi, qernertormiorsuaq! Muslimersuaq! Taakkummi inuit, uatsitullu inuupput. Inuit ajunngitsut, ajortutut siumungaaq isummerfigereerneqartarput, naak inuttut nalugaluarlugit qanoq ittuunersut. Uuma suliama siunertaraa, siumungaaq isummertannginnissaq, Henrik Saxgren oqarpoq.

Henrik Saxgren, kalaallit pillugit ima oqarpoq.

- Kalaallit qeqertarmiusullu allatut, inuttut ilisimasarinngikkaanni aallaqqaamut tunuarsimaartuupput. Inuttulli ilikkaraanni, inuupput asannittut assut, Henrik Saxgren naggaasiivoq.