Nunatsinnut juullimi inuulluaqqussut

Sapaatiuppat adventit sapaataasa sisamaanni Danmarkimiit nunatsinnut juullimi inuulluaqqusineq Danmarksradiop KNR-llu suleqatigiillutik TV-kkut toqqaannartumik aallakaatissavaat.

Juullimut nunatsinnut inuulluaqqusineq sioqqullugu

Tivolimi neriniartarfimmi Nimbimi kalaallit Danmarkimiittut peqatigiiffiat Foreningen Grønland kaffisortitsissaaq kalaallit kaagilerlugu.

Nunatsinnut juullimut ukioq manna 73-sissaannik inuulluaqqusinissamut isissutissat billitsit qangali nungunneqareersimapput. Siorna Inuulluaqqusinermi oqaluttuusut erinarsortartoq Julie Berthelsen aamma nakorsaq Peter Qvortrup Geisling ukioq manna oqaluttooqqissapput.

Inuulluaqqusinissami erinarsoqatigiit Aavaat kiisalu erinarsortartoq Aviaaja Lumholt nipilersoqatigiillu TV2 tusarnaartitsissapput.

Danmarkimit nunatsinnut juullimi TV-kkut toqqaannartumik inuulluaqqusineq KNR TV-kkut sapaatiuppat decembarip 18-ianni ualikkut nalunaaqutaq sisamaniit tallimanut malinnaaffigisinnaavarsi.

Juulliaqqami kalaallit Københavnimiittussat kalaallisut naalagiarnissamut aamma periarfissaqassapput, tassa

Københavnimi Helligåndskirkemi kalaallisut Juulliaqqami naalagiartoqassaaq, taanna nunatsinni TV-kkut toqqaannartumik isiginnaarneqarsinnaassaaq juulliaqqami nalunaaqutaq ataatsimiit.

Juulliaqqami naalagiartitsissaaq palasi Jens Kristian Kleist. Københavnimi Helligåndskirkemi juullerujummi kalaallisut aamma naalagiartoqassaaq.