Nunatsinnut aqqutissaqarusuppoq

Danskit naalagaaffiata Nunavummi aallartitaat Ken Harper, Nuup Iqaluillu akornanni timmisartukkut aqquteqalernissaa sorsuutigiualerpaa.

Allaanngilaq iikkamut apoqattaaginnarluni, Ken Harper Nunatsiaq News-imut oqarpoq.

Kalaallit Nunaata Nunavullu akornanni niueqatigiinnerulernissaq anguniarlugu, sapaatip akunnerani kingullermi isumaqatigiittoqarneranut atsioqatigiinnertalimmut atatillugu anersaaruluutini Ken Harper-ip oqaatigaa.

Pisumi Ken Harper, aammalu Danmarkip, Canadami aallartitaa Poul Kristensen, Nunavummilu naalakkersuisut siulittaasuat Paul Okalik inatsisartunillu ilaasortat, akunnerup missaanik utaqqipput, Hans Enoksen, timmisartumut attartukkamut kinguaattooqasumut ilaasoq utaqqillugu. Tamannalu piviusoorpianngitsutut misiginarpoq, ingammik attaveqaqatigiinnerulernissaq eqqarsaatigigaanni Nunatsiaq News allappoq.

Ken Harper paatsuugassaanngitsumik oqarpoq:

- Nuup Iqaluillu akornanni timmisartukkut attaveqalernissaa anguniarlugu kikkut tamaasa timmisartortitsisarnermut tunngasunik suliaqartartut saaffigisaraluarpakka iluatsinngitsumilli. Aamma aallartitatut sulilernissamut akuersaarninnut patsisaasunut ilaavoq, Nuup Iqaluillu akornanni timmisartukkut sapaatip akunneranut ataasiarluni attaveqartalernissap anguniarnissaa.

Timmisartuussisarnissamut tapiiniaratik, Nunavummi Kalaallit Nunaannilu naalakkersuisut erseqqissarsimavaat.

- Timmisartuussisarneq piviusunngussappat Kalaallit Nunavummiullu naalakkersuisui soqutiginnilertariaqarput, Ken Harper naggasiivoq.

Arctic Bay-ip Kalaallit Nunaatalu akornanni attartorluni timmisartuussinermik siusinnerusukkulli Ken Harper aamma misilittagaqarpoq.