Nunatsinnukarnissaq kinguartippaa
- Nunarsuaq tamakkerlugu akiitsoqarnermik ajornartorsiuteqarnermik, kiisalu naalakkersuisut sulinerannik pissuteqartumik, Lars Løkke Rasmussenip Kalaallit Nunaannut pisortatigoortumik qaammatip naalernerani tikeraarnissaralua kinguartinneqartoq, ministeriaqarfimmiit ilisimatitsissutigineqarpoq.
Nutaarsiassaqartitsivimmi Ritzauimi allaaserineqartut naapertorlugit aningaasanut inatsisissap saqqummiunneqarnerani Lars Løkke Rasmussen Kalaallit Nunaanni Nuummiissappat tamanna ajornartorsiutitut naalakkersuisunit isigineqassaaq. Tassalumi tamannarpiaq marlunngorpat pissaaq.
Angalanissaq ukiumi ataatsimi piareersarneqarsimavoq, kisiannili nunarsuarmioqatigiit aningaasaqarnikkut annertuumik ajornartorsiornerisa, ineriartortitsinissallu pisariaqartumik naalakkersuinikkut oqallisigineqarnissaa eqqarsaaatigalugu, nalilerneqarpoq, saqqummiussinissamut, aningaasaqarnermut ministerimit nalinginnaasumik saqqummiunneqartaraluartumut, Løkke peqataaguni ajunnginnerussasoq.
- Aammalumi sumik arlaanik pisoqarnissaa soorluuna ilimanarsiartortoq. Imaassinnaavoq ministeriunerup siuttuuffigisaanik aningaasaqarnermut inatsisissaq, ineriartortitsinissaq pillugu annertunerusumik imalimmik ilaqartinneqartoq, tamatumalumi aamma Løkke-p qinersinissamik nalunaaruteqariataarnissaa tamassuma ilimanarsisippaa, DR-ip Naalakkersuinermik suliaqarnermut atatillugu aaqqissuisua Ask Rostrup oqarpoq.
Tamanna pissappat, aggustip 23.-iani danskit aningaasaqarnerat pillugu apeqqutinut aalajangiisuusunut taamaaliornikkullu aamma qineqqqusaarnissamut apeqqutit pillugit akissuteqarsinnaalissaaq. Taamaaliornerlumi aamma kajumminnaateqarsinnaavoq - tassa suliniuteqarususseqarluni qinersinissamik suaaruteqarneq, malinnaasunit nalilerneqarpoq.
