Nunatsinnit Nunavummut silaannakkut
Air Greenland Canadap avannaanut timmisartuussisalissappat illoqarfiit arlallit orninneqartarusupput.
Aammali illoqarfiit kujasinnerusumeersut Halifax, St. Johns kiisalu Vaali tikinneqartarusupput. Taamatut Danmarkip Nunavummi aallartitaa Kenn Harper CBC Newsimut oqarpoq, pisortatigullu tamanna ilumoornerarneqarpoq.
Harperip Nunavummi niuertuusup Air Greenlandip Iqalunnut mittalernissaa anguniaqqullugu pisortat kajumissaarpai. Nuummiit Iqalunnut timmisartuussisarneq 2001-imili taamaatinneqarmat aallartinneqaqqinnissaa Kenn Harperip sulissutigisimavaa.
Illoqarfiit taakkua marluk akornanni timmisartorneq akunnerup aappaata affaannaanik sivisussuseqarmat, Kalaallit Nunaata Nunavullu takornariaqarnikkut inuussutissarsiutillu ineriartortinneqarnissaannut iluaqutaajumaartoq Harperip ilimagilluinnarpaa.
Taamaammat Air Greenlandip Iqalunni mittarfimmut akiliutigisagassaanik Nunavummi pisortat illoqarfinnit allanit pingasunit akikinnerusumik Harperip
neqerooruteqaqquai.
Kalaallit Nunaata Nunavullu akornanni timmisartuussisalernissaq Nunavummi ministeriunerup Eva Aariaap aamma tapersersorpaa, kulturikkut atassuteqaqatigiinnerulernissaq pingaartinnerullugu.
