Nunatsinnit Københavnimut angalaneq 4.000 kr.-it ataallugit akeqalissaaq
- Timmisartortitseqatigiiffik Aluu Airlinesimik taaguuteqassaaq. Kalaallit Nunaanni suliffeqarfiussaaq kalaallinit pigineqartoq, Kuno Fencker, Aluu Airlinesimi niuernermi pisortaq, KNR-imut oqarpoq.
Aluu Airlines Pele Brobergimit, siornatigut Air Greenlandimi pilotiusimasumit, massakkullu Copenhagen Business Schoolimi ilinniartumit pigineqarpoq.
Aluu Airlinesip Kalaallit Nunaanni nujugallit akikitsumik pitsaasumillu Nunatta iluani Danmarkimullu angalasinnaanissaat soqutigisaraa.
- Anguniarparput Kalaallit Nunatsinni akikitsumik tutsuiginartumillu Nunatta iluani avataanullu angalanissamik periarfissinniarlugit. Taanna siullertut pingaartitarivarput, Kuno Fencker oqarpoq.
AAMMA ATUARUK Air Greenland nunatsinneersumik unammillerteqalerpoq
Timmisartortitseqatigiiffik nutaaq siunissami angorusutanik aamma takorluugaqarpoq.
- Takornarianik amerlisaasinnaasutut pilerinarsaasinnaasutullu kiisalu Nunatsinni aningaasanik annertunerusumik kaaviiaartitsinissamik siunertaqarluta taamannak aallartitsivugut, Kuno Fencker KNR-imut nassuiaavoq.
Nuummit Københavnimut, taamatuttaaq Ilulissanit Københavnimut Aluu Airlinesimut ilaaneq 4000 koruunit ataallugit akeqassasoq niuernermi pisortap oqaatigaa.
Kuno Fenckerip oqaatigaa Ilulissanit Nuummiillu Københavnimukarneq 4000 koruunit ataallugit akeqassasoq, oqaatigalugulu Kangerlussuarmit Københavnimut angalaneq akikinnerulaassasoq.
Aluu Airlinesip Københavnimut timmisartuussisarnermi Airbusimik meqqilik atugariniarpaa. Nunattalu iluani timmisartoq ATR-imik meqqilik timmisartuussissutiginiarlugu.
Timmisartortitseqatigiiffiup nutaap timmisartunik attartussanerluni imaluunniit nammineq pisissanerluni oqaatigisinnaanngikkallarpaa, aningaasaaliisussat qanoq aningaasaliitigissanersut apeqqutaammat.
Aluu Airlines juunip aallaqaataani timmisartuussilissasoq naatsorsuutigineqarpoq.