Nunatsinnit kikkut Folketingimut qinigassanngortissanersut suli nalunartoq

Folketingimut qinersisoqarnissaanut atatillugu kikkut qassillu Nunatsinnit sassarniarnersut annerusumik suli ilisimasaqarfiginngilarput.
Assi © : Simon Uldum
maajip 27-at 2015 06:54
Nutserisoq Mads Lynge

Inuit Ataqatigiit Folketingimut ilaasortaatitaata Johan Lund Olsenip, Inuit Ataqatigiit siulittaasuanut Sara Olsvigimut sinniisuusup sassarnissaa ilisimavarput. Kisimiillunili sassassanersoq aamma suli nalunarpoq.

Siumut sinnerlugu ilaasortap Doris Jakobsenip sassaqqinnissaa ilimagineqanngilaq. Taassuma Peqqissutsimut Naalakkersuisutut sulileqqinnissaa ilimagineqarpoq.
Taassuma taamanikkut parteeqataa Nick Nielsen, Doris Jakobsenimut sinniisuusoq, Folketingimut ilaasortaanerminit tunuartinneqarpoq. Pituffimmik sullissinissamut isumaqatigiissutip annaaneqarneranut Naalakkersuisut iliuuserisaat pillugit oqaaseqarnerminut Folketingimi ilaasortatut tunuartitaalluni. Nick Nielsenip Folketingimit ilaasortaajunnaarsinneqarnissaa Naalakkersuisut siulittaasuata Kim Kielsenip taamanikkut aalajangerpaa.

AAMMA ATUARUK Folketingimut qinersinissaq ministeriunerup ullumi suaarutigissavaa

Siumut sinnerlugu kina imaluunniit kikkut sassarniarnersut suli ilisimaneqanngilaq. Naalakkersuisunulli siornatigut siulittaasuusimasup Aleqa Hammondip, Nuummi immikkoortortaqarfik sinnerlugu sassartunut ilaanisssaa, sapaatip-akunnerata siuliani nalunaarutigineqarpoq.

Partiit allat, Demokraatit, Atassut Partii Nalerarluunniit Folketingimut sassartitaqassanersut aamma suli ilisimaneqanngilaq.

AAMMA ATUARUK Hammondip qinigassanngortissinnaaneranut akuersisut akerliusullu