Nunatsinni innuttaasugut siorna 2006-mut naleqqiulluta ikinnerulersimavugut, ukioq manna januaarip aallaqqaataani 56.648-nngorsimalluta siorna januaarip aallaqqaataannut naleqqiulluta 253-nik ikinnerulersimalluta, tamannalu Nunatsinni Naatsorsueqqissaartarfiup innutaasunik naatsorsuusiaani kingullermi atuarneqarsinnaavoq.
Ikileriaateqarsimanerput Nunatta avataanut nussortut Nunatsinnut nussortunit amerlanerulersimanerannik pissuteqarpoq.
Siorna 2006-imi innuttaasut 644-t nunatta avataanut nuussimapput, nuuttut amerlanersaat 490-t tassaasimapput meeqqat 15-it inorlugit ukiullit aamma inersimasut 25-t 59-illu akornanni ukiullit.
Naatsorsueqqissartarfiup naatsorsuutaani aamma takuneqarsinnaavoq, inersimasut 25-t 34-llu akornanni ukiullit ukiut qulit kingulliit ingerlaneranni pingasoriaammik ikileriarsimasut.
Taavalu meeqqiornikinnerulersimagatta meeqqat ukioqanngitsuniit qulingiluat tikillugit ukiullit aamma malunnaatilimmik ikileriarsimapput.
Nunatsinni inunngorsimasut pingajorarterutaat 20-t inorlugit ukioqartuusut innuttaasullu pingajoraterutaat allat nunatta avataani inunngorsimasuusut, kiisalu angutit arnanit amerlanerusut, tamannalu nunatsinnut nutsertut angutaanerusarnerannik pissuteqartoq,
Naatsorsueqqissaartarfiup nalunaarusiaani erserpoq.