Nunatsinnit amerlanerit peqataasariaqarnerat
Nunatsinni Inuit Issittormiut Kattuffianni avatangiisit pinngortitarlu pillugit immikkoortortaqarfimmit silaannaap allanngoriartornera pillugu Reykjavikkimi ataatsimeersuarneq malinnaaffigineqarpoq. ICC sinnerlugu peqataasoq Lene Kielsen Holm nunatsinnit peqataasukinnera pillugu ima siullermik oqarpoq:
- Isumaqarpunga amerlanerujussuusinnaagaluartut.
Pinngortitap pissusaa kikkunut tamanut kinguneqartussaavoq. ICC-minngaanniit isumaqarput nunatsinni sakkusatsinnik katersissagutta, ataatsimeersuarnerit imaattut peqataaffigisariaqarpavut.
Namminersornerullutik Oqartussanit peqataasut amerlanerusariaqarput.
- Nunatta avatangiisitta atuisuinit oqaluttuarsinnaasunik peqataasinnaasoqaraluarpat pitsaaneroqqajaqaaq.
- Namminersornerullutik Oqartussat pisussaaffigaat inuiaqatigiit piareersaatissallugit.
Lene Kielsen Holm, Reykjavikkimi ataatsimeersuarnermi peqataasoq oqarpoq, nangillunilu.
- Issittumi pinngortitaq allanngoreersimavoq, taannalu aallaavigalugu sulilereertariaqarpugut, maannami annilaanganartoqareerpoq, Lene Kielsen Holm, ICC sinnerlugu peqataasoq radioaviisimut oqarpoq.
Lenep aamma oqaatigaa issittumi nunat inuiisa siunissami allanngoriartornerup kingunerisaanik pisussat pillugit sulinuteqarnermik ICC maanna aallartitsereersoq.
