Nunatsinniit OL-mut siunissaq suli upperineqarpoq

Danskit kultureqarnermut ministeriata Brian Mikkelsenip nunat tamat OL-imut peqataasussanik toqqaasartuisa pisortaannik Jacques Roggemik ataatsimeeqateqarnermini timersortartut nunatsinneersut siunissami OLimut peqataasalernissaannik neriorsuutisinngilaq.

OL-imili aqutsisunik ataatsimeeqateqarnissaminnik neriorsorneqarnertik, isummaminnillu saqqummiussisinnaalernertik timersortartutta isumalluarnartoqartippaat.

- OL-imi peqataasussanik toqqaasartut nunatta naalakkersuinikkut inissisimanera, namminersulernialerneralu ilisimasaqarfigisunganngilaat.

Nunatta Naalagaaffiit Peqatigiiffiannut namminersortutut ilaasortanngornissaa ungasigunnaarsorinarpoq. OLimut erfalasorput ilisarnaatigalugu peqataanissatsinnut danskit timersortartuinit, tunniutiinnarpasereersunit isumalluarneruvugut, arpattartoq Kim Godtfredsen oqarpoq.

Nangilluni neriuutigaa OLertoqalersillugu ikumatitap nunatsigut angallanneqarsinnaanera.

OL-immi nunaviit tallimat ataatsimoortittarpai, qeqertalli annersaat avannarpasinnersaallu amigaataasoq, Kim Godtfredsen, qanittumi nunatta timersortartuisa OL-imut peqataasalernissai tapersersorlugu ikumatitalisarluni ingerlaaqatigiinnermik aaqqissueqataasoq, atsiornernillu katerseqataasoq naggasiivoq.