Nunatsinniit nutaarsiassat Nunavumi pingaartinneqaqaat
Nunavumut saalaassaagut. Issittumi pisut assigiinngitsut Nunatsiaq Newsip internetikkut aviisiani tusagassiutitigut 2005-imi saqqummiunneqarsimasut misissorneqarsimapput.
Issittumi ukioq kingulleq pisunik pingaarnersiuinermi nunatsinnit tusagassiutitigut saqqummiunneqartut qulit Nunatsiaq Newsip pingaarnersiugaani akornanniipput.
Tusagassiutitigut saqqummiunneqartut qulit pingaarnerit akornanni arfineq-marluk nunatsinneersuupput.
Pave Johannes Paulip apriilimi toquneranut atatillugu Josef Motzfeldtip, issittumi politikerit allat assigalugit, oqaaseqaatai, issittumi pisuni pingaarnertut tusagassiutitigut saqqummiunneqartut toqqarneqarsimapput.
Igalikumi isumaqatigiissut pingaarnerup tulliatut toqqarneqarpoq. Kulturikkut, ilisimatusarnikkut, ilinniartitaanikkut oqaatsitigullu suleqatigiissuteqarnissaq, Igalikumi isumaqatigiissummi aqqutissiuunneqarpoq.
Taakku saniatigut Ilulissani silaannaap allanngoriartornera aasallu ingerlanerani Tartupaluup assortuussutigineqarnera, nannuttassat siullermeerlutik oqaluuserineqarneri, novembarimi inatsisartunut qinersineq kiisalu CIA- p isertortumik timmisartuussisarneri ilanngunneqarput.
