Nunatsinniit Nunavummut timmisartukkut aqqut
Nunatsinniit Nunavummut timmisartukkut aqqut siunissami ammaanneqarataannaavoq.
Nunavummi atorfilittat inuussutissarsiornermillu suliallit inuit aqqanillit KNI-p tikeraartoreqqammerpai.
Nunani taakkunani marlunni niiveqatigiinnikkut periarfissaasinnaasut timmisartukkut aqquteqalerneratigut qanillattorneqartut, KNI-mi attaveqarnermi pisortap Vittus Qujaakitsup oqaatigaa.
- Nunavumeersut nunatsinneersullu inuussutissarsiornermik ingerlataqartut assigiinngitsut sisamanngormat isumasioqatigiillutik oqallinneranni ilaatigut eqqartorneqarpoq nunatta Nunavuullu akornanni niivernermut takornariaqarnermullut tunngatillugu timmisartuussisalernissaq eqqartorneqartut ilagaat, Vittus Qujaakitsoq oqarpoq.
Taanna erseqqissaavoq aasaq manna naalakkersuisunit siunniunneqarsimasoq nunatta Nunavuullu akornanni niivernikkut ingerlatsisoqalernissaa.
- Nerisassat asiuasut eqqartorneqartunut ilaapput taavalu atortussat soorlu biilinut qamuteralannut kiisalu nioqqutissat ulluinnarsiutaanerusut pineqarput, oqarpoq.
Vittus Qujaakitsoq aamma oqarpoq eqqartueqatigiittoqarnerani inunnik angallassinissaq kulturikkut paarlaasseqatigiinnermut tunngatinnerullugu aamma eqqaaneqarsimasoq.
Alloriarnerlu tulleq tassaassaaq eqqarsaatip tamatuma imminut akilersinnaanerata nalilersorneqarnissaa – taamatuttaaq niiveqatigiinnermi tunngavissaasinnaasut nalilersorneqarnissaat.
