Nunatsinniit aallartitat hotelip inaanut iseqqusaangitsut

Naalakkersuisunut ilaasortat Palle Christiansen aamma Maliina Abelsen, piujuaannartitsinissaq tunngavigalugu ineriartortitsinissaq pillugu Rio de Janeiromi ataatsimiinnermi Nunarput sinnerlugu peqataapput, Riomili inissinniarnerat ajornaatsuinnaasimanngilaq.
Allattoq Mads Lynge
juunip 19-at 2012 12:17

Rio de Janeiromut tikikkamik ajornartorsiulereerput, Palle Christiansen oqarpoq:

- Naak hotelimi inissagut inniminnereerlugillu akilereeraluarivut, tikikkatta paasivarput tassani najugaqartussatut allattorsimaffinni allassimanngitsugut. Taava inissavut pilluta pilluta iluatsippavut, Ilinniartitaanermut, Ilisimatuarnermut Nunanullu Avannarlernut suleqateqarnermut Naalakkersuisoq Palle Christiansen oqarpoq.

Ajornartorsiutillu tamaanga killeqanngillat:

- Atorfilittavut hotelimut ippassaq unnukkut apuukkamik paasilerpaat matuersaatit atorneqarsinnaanngitsut. Matuersaatit atorneqartut kortitut iluseqarput, hotelimillu ingerlatsisut attassimavaat hotelimi pineqartumi najugaqarnissarput akilersimanngikkipput, kortillu atorunnaarsissimallugit. Taamaammat Danmarkip aallartitai, tassa folketingimut ilaasortat, naalakkersuisunilu ilaasortat, Savalimmiormiut aallartitaat uagullu hotelitsinnit anisitaasimavugut, Palle Christiansen oqarpoq.

Hotelimi sulisut taava sivisuumik aatsaat oqaloqatigineqarput, nassuiaavigineqarlutillu. Taamaalimmat inissatik iserterfigisinnaanngorpaat.
Taamatulli ajornartorsiuteqartuarnerup ataatsimiinnerup inernerisinnaasaanut sunniuteqarsinnaasoq, Palle Christiansenip aarleqqutigaa.

- Ullup ingerlanerani ataatsimeeqattaarnernit isumasioqatigiinnerniillu unnukkut qulit aqqarnullu missaanni uteraangatta ullormut oqaluuserineqarsimasut nalilersortarpavut, aqagussamullu sammisassavut oqaluuserisarlutigit, taamaammat avatangiisivut pitsaanerusariaqarput. Illoqarfissuarmi Rio de Janeiromi assersuutigalugu ataatsimiinnitsinni angusaqarluassagutta avatangiisit pitsaanerusariaqarput, Palle Christiansen oqarpoq.

Atorfilittalli ataatsimiinneranni maannamut ataatsimiittoqarpoq, qinikkallu aqaguminngaanniit ataatsimiilerumaarlutik.
Tamanna pillugu sukumiinerusumik unnugu Radioaviismi tusagassaqarumaarpoq.