Nunatsinni uummatikkut nappaateqalersarneq pillugu ilisimasat ilisimatuut apeqquserpaat
Danskit ilisimatuut Bang aamma Dyerbergip omega 3-fedtsyrinut tunngatillugu kalaallit akornanni ilisimatusarnermi paasisaat 1970-ikkunniilli uummatikkut nappaatit katsorsarneqartarnerini aammalu uummatikkut nappaatit ilisimatusarfigineqarnerini ataqqineqarlutik atorneqarsimapput.
Taamanimi isumaqartoqarpoq naggueqatigiit inuit kalaaliminernik, soorlu puisit aamma arferit orsuisa omega 3-fedtsyrinik akoqarluartunik nerisaqarnerat pissutigalugu taqqatigut qerattartoornermik tamatumalu kingunerisaanik uummatip taqaasigut nappaateqalernissamik millisitsisitsisartoq.
Tamannali paatsoorujussuarneqarsimasoq norgemiut nittartagaanni forskning.no-mi allaaserineqarpoq.
Danskit ilisimatuut ilisimatuussutsikkut misissuinerminni paasisaat pisoqqat canadamiut ilisimatuuinit misissorneqarsimapput, tassungalu atatillugu nunatsinni peqqissutsimik ilisimatusarnikkut paasisat nutaat ilanngullugit misissorsimallugit. Taakku misissuinermi paasisaasa takutippaat naggueqatigiit Inuit allatuulli uummatip taqaatigut nappaateqalersinnaasut.
- Tamanna ilumoorpat, omega-3-mik ilisimatusarnerup ilarujussua eqqunngitsumik toqqammaveqarluni ingerlanneqarsimassaaq, norgemiu uummatip pissusaanik immikkut ilisimasalik, Steinar Madsen, forskning.no-mut taama oqarpoq.
Canadamiullu naapertorlugit eqqunngitsumik paasissutissiisoqartarsimaneranut pissutaasinnaasoq tassaavoq ilisimatuussutsikkut misissuinermi paasisat ukiorpassuarni eqqunngitsumik issuaavigineqartarsimanerat.
- Naggueqatigiit Inuit nerisarisaat ilisimatusarfigaat nerisarisartagaasalu aalisakkat orsuinik akoqarluarnerat pissutigalugu taqqatigut qerattartoorsinnaanerannik millisitsisarsoralugu, canadamiut ilisimatuut misissuinermi nutaami peqataasut ilaat, George Fodor, taama oqarpoq.
Bangip Dyerbergillu Kalaallit Nunaanni toqusut allattorsimaffii pisortatigoortut taamatut isumaqarnerminnut tunngavilersuutigimavaat. Nalunaarsorsimaffinnilu uummatip taqaatigut nappaateqarlutik toqusimasut qaqutigoortupilusuusimapput. Ilisimatuulli canadamiut isumaqarput Kalaallit Nunaanni toqusut allagartaasa 20 proncetiisa inuit sumik toqquteqarnerannik takussutissartaqarsimannginnerannik tamanna peqquteqarpoq.
Omega-3 uummatip taqaasigut nappaatinut iluaqutaannginnera 2012-imi misissuinerup allap inernerisa aamma takutippaa.
Misissuineq nutaaq suliffissuaqarnermut omega-3-mik tunisassiorfiusumut milliardinillu kaaviiartitaqarfiusumut ajoqutaalluinnarsinnaasoq, atuagassiami Canadian Journal of Cardiologymi saqqummersinneqarpoq.