Nunatsinni uuliasiornerup unitsinneqarnissaa Greenpeacep naalakkersuisunut inassutigaa

Arlalitsigut ajornartorsiuteqartareerluni Shell issittumik uuliasiorallarunnaarniarluni aalajangerpoq taamaasillutillu avatangiisinik illersuiniat anersaarulussinnaanngorput. Taamaattoq Shellip saniatigut suliffeqarfissuit arlallit suli nunarsuup avannarpasissortaani uuliasiorput. Uuliasiorfigineqartut ilagaat Nunatta imartaa.

- Kalaallit politikkerii unikaallallutik eqqarsaqqittariaqarput paasissutissallu misissorluarlugit. Tunngavissaqanngitsumimmi nunarsuarmi uuliarsiorfiit anginersaasa ilaat suliaminik unitsitsinngilaq. Issittumi pissutsit nunarsuup sinneraniit ima allaanerutigaat avatangiisit innarliasuarsuullutik. Taamaammat Naalakkersuisut unikaallattariaqaraluarput, Greenpeacemi issittoq pillugu ataqatigiissaarisoq Jon Burgwald KNR.gl-mut oqarpoq.

Nunatta imartaani uuliasioqqilerneq Greenpeacep eqqarsarnartoqartippaa. Uuliasiortut siornatigut misilissimanngisaminnut pisussanngornerat ernumanartoqartippaat. Taamaammat Greenpeace isumaqarpoq Nunatta imartaani uuliasiornermut akuersisoqartariaqanngitsoq.

- Paasisinnaalluarpara Kalaallit Nunaata pisuussutit uumaatsut atorusummagit. Inassutigerusunneruarali aatsitassat qaqutigoortut nunamiittut atorneqarnissaat. Uranimik akoqalaaraluarunik ajunngilaq tamanna uuliasiornermiit pilerinarneruvoq. Imaani avatangiisit innarlerneqartarnerat aqukkuminaatsorujussuuvoq, illuanik urani tuniniarnagu isumannaatsumik pigaanni ajornartorsiutaanera annikinnerulluni. Uuliasiorneq Kalaallit Nunaanni misilittagaqarfigineqanngilaq taamaammat mianersorluinnarluni tamanna isummersorfigineqartussaavoq, Jon Burgwald oqarpoq.