Nunatsinni uuliaqarsinnaanera tuluit eqqumaffigilerpaat
Skotlandimiut uuliasiortitseqatigiiffiata Cairn Energyp Nunatsinni uuliasiorluni qillerinissamut akuersissutimi ilaannik, Malaysiamiut uuliasioqatigiiffiannut gassisiortitseqatigiiffiannullu Petronas-imut tunisaqarnerata kingornagut, Cairn Energyp pappiaraatai piginneqatigiissutit ukiormanna qaffasinnerpaanngorsimasut, Danmarkimi aviisimi Berlingske Business-imi allaaserineqarpoq.
Tuluit pappilissanik piginneqatigiissutinik niuffaffianni, Nunatsinni uuliamik ujaasinissamut akuersissutinik nalilersuiniarneq manna tikillugu ajornakusoortinneqarsimavoq, kisianni Cairn Energyp uuliamik ujaasilluni qillerinissamut akuersissutaatimi 10 procentii 350 millionit koruunilerlugit tunisimallugit sapaatip akunnerani kingullermi nalunaaruteqareersorlu, aningaasaliisartut eqiilerput, piginneqatigiissutillu nalingi qaffarujussuartillugit.
Cairn Energyp Nunatsinni uuliamik ujaasinissamut akuersissutaataasa nalingi, maanna katillugit 3 milliardit koruuninik nalilerneqarput, naak misileraalluni suli qillerisoqanngikkaluartoq.
Nunatsinni qillerinissamut akuersissutit aatsaat taamatut naleqartigilerput allanullu tuneqqinneqarlutik.