Nunatsinni uuliamik nassaarnissamut neriuuteqarluartut
Uuliasiortitseqatigiiffik Baffindip Kangerliumarngani uuliasiornissaminut akuersissummik ippassaq piniariarmat, Londonimi aningaasanik niuerfinni piginneqatigiissutit nalingi 0,8 procentimik qaffapput.
Maersk Oilip akuersissutaanit 40 procentit Tullowip pivai, Maersk Oililllu 47,5 procentit maanna pigilerpai, uuliasiornermilu suli aqutsisuussalluni.
Tullow Afrikap kimmut sineriaani taamaallaat manna tikillugu uuliasiortaraluarpoq, uuliasiortitseqatigiiffimmilli tassannga oqarnerat naapertorlugu Afrikami misilittakkatik Nunatsinni Tooq-licensimut assingusussaapput. Irlandimi aviisimi Independentimi tamanna allaaserineqarpoq.
Maersk Oilip NunaOil suleqatigalugu Baffinip Kangerliumarngani sajuppillatsitsilluni uuttortaareerpoq. Uuliasiortitseqatigiiffik tamaani misileraalluni qillerinissaminut qinnuteqassanersoq uuttortaanerit inerneri apeqqutaasorujussuussapput. Misissuinissami pisortaq, Lars Nydahl Jørgensen, aviisimut Jyllands-Postenimut oqarpoq, Maersk Oilip taama annertutigisumik maannamut oqartussaanera qaqutigoortuusimasoq.
- Ilisimasanik, ajornartorsiutaasinnaasunik, aningaasartuutinik misileraallunilu qillerinissap inerneriumaagassaanik avitseqatigiinnissaq pingaaruteqarpoq. Immaqa oqartoqarsinnaavoq isumaqatigiissut nalinginnaalissasoq. Suliffeqarfiit amerlanerit 20- 50 procentillu akornanni piginneqataanissartik kissaatigisarpaat, taamaammat 47,5 procent annertoqaaq, Lars Nydahl Jørgensen aviisimut Jyllands-Postenimut oqarpoq.
