Nunatsinni utoqqaat pisinnaatitaaffii assigiinerusariaqarput

Utoqqaat isertitaqassusiat apeqqutaatillugu, taakkua angerlarsimaffimmi ikorteqartinneqarnerminnut akiliisinneqartarput ilaallu akiliisinneqassanatik. Akiliutit angissusiat kommunimiillu kommunimut assigiinngitsuupput. Utoqqaat assigiinnerusumik pisinnaatitaaffeqalernissaat pisariaqartoq, utoqqaat nuna tamakkerlugu kattuffianni siulittaasoq isumaqarpoq.

- Utoqqaat sullinneqartartut kommunimiit malittarisassat malillugit akiligassinneqartarput ilaallu akiligassinneqarneq ajorlutik. Taamattumik anguniagassat ilagivaat assigiimik pineqartarnissaq, tamarmik akeqanngitsumik sullinneqartarnissaat kissaatiginarpoq, Utoqqat Kattuffianni siulittaasoq Ole Kreuztmann taama oqarpoq.

Radioaviisi angerlarsimaffimmi ikiortinut tunngatillugu nunatsinni paasiniaammat paasinarsivoq, sulisut amerlassusaat illoqarfimmiit illoqarfimmut aamma nunaqarfimmiit nunaqarfimmut assigiinngitsorujussuusut. Ilulissani utoqqaat ikortariallillu allat 90-it qulingiluanik angerlarsimaffimmi ikiorteqarput. Qaqortumilu taama pisariaqartitsisut 48-t arfineq pingasunit sullinneqarput. 

Radioaviisimi sapaatip akunnerata siuliani oqaatigaarput nuummi angerlarsimaffimmi ikiortit allanngorarpallaarnerat peqqutaalluni utoqqaat ikiorneqarnissaminut pisariaqartitsivallaanngitsut kingulliunneqartartut.

Utoqqarnik assigiinngitsumik sullissineq Ole Kreuztmannip naammaginngilaa. Utoqqaat amerliartornerisigut taakkununnga sullissineq pitsanngorsartuarnissaa pisariaqartoq oqaatigaa.

- Utoqqaat sullinneqarnissaat tunngavigalugu angerlarsimaffimmi ikiortit pikkorissartuarnissaat siunissami pingaartinneqarpoq. Taamaatumik taakku aqqutigalugit utoqqaat assigiikkannersumik sullinneqarnissaat anguniarneqarsinnaapput ukiuni aggersuni, Ole Kreuztmann oqarpoq.

Ole Kreuztmann isumaqarpoq kommunit assigiinerusumik utoqqarnut sullissisariaqartut.

KANUKOKA-p siulittaasua Martha Abelsen utoqqaat novembarimi isumasioqatigiinneranni peqataavoq. Isumaqasioqatigiinnermi kommunit ataasiakkaat utoqqarnut sullissinerisa assigiissaarnerulernissaat anguniakkanut ilaavoq.

Martha Abelsenillu kommunit qulaallugit aalajangiisinnaanngikkaluarluni, Ole Kreuztmannip utoqqaat sinnerlugit siunersuutai tusaatissatut tiguai.

- Oqariartuutigineqartut qujaruppagut, tusaatissatullu tiguagut, ingerlaqqissaagut. Maannangaaq suliassatut tigunikuuagut, tunngaviit assigiinngtsut qulakkeerneqarpata ingerlaqqissinnaasalluta, Martha Abelsen oqarpoq.