Illittaaq timersoqatigiit illersortakkatit TV-kkut toqqaannartumik aallakaatinneqartumik unammineranni suaartarneq, timersortarfimmi isiginnaarneq qiimmassaanerlu unammeqataanikkulluunniit angusaqarluarneq amigaatigaajuk?

Taamaappat qaammaterpaalunni suli naammagittartariaqarputit.

Namminersorlutik Oqartussat kommuninut allanut angalalluni katersuunnermut killilersuinernik sivitsuinerisa ilutigisaannik nunatsinni upernaaru pissartanngorniuunnissaraluit taamaatittut, Kalaallit Nunaanni Timersoqatigiit Kattuffiat ilisimatitsivoq.

Katersuunnermut maleruagassat januaarip ulluisa tallimaanni atuutilertut apriilip naaneranut atuupput. Taamaammat kommunimi ataatsimi illup iluani timersornermik aaqqissuussani peqataasut 100-nit amerlaneroqqusaanngillat, silamilu timersornermik assigisaannilluunniit aaqqissuussani peqataasut 250-nit amerlaneroqqusaanatik.

AAMMA ATUARUK Futsal: Niklas Thorleifsen Champions Leaguemi unammeqataassaaq

Tamannalu timersuutini assigiinngitsorpassuarni assersuutigalugu sisorarnermik, nerrivimmi arsaararnermik assammillu arsarnermik nunatsinni upernaaru pissartanngorniuunnissaraluit taamaatinnerannik kinguneqarpoq.

- Nunatsinni pissartanngorniuunnissaraluit taamaatittariaqaratsigit uggoreqaarput, takusinnaagatsigummi tamanna uninngaannartariaqarnermik kinguneqassasoq. Tamannali nappaammik nunarsuaq tamakkerlugu tuniluuttumik peqquteqarmat soorunami aamma paasisinnaalluarparput, Kalaallit Nunaanni Timersoqatigiit Kattuffiata siulittaasua Nuka Kleemann oqarpoq. 

Unammiuaarnissanik aaqqissuussisoqaleruttortoq

Nunatsinnili timersornerup silarsuaa unittuuvinnavianngilaq. Kattuffiummi nunatsinni timersoqatigiiffiit suleqatigalugit kommunini ataasiakkaani unammiuaarnissanik aaqqissuussinissamut taakkunanilu timersornerup silarsuaani ineriartortitsinerunissamut periarfissat misissuleruttorpai.

- Maannamullumi takusinnaareerpagut Covid-19 peqqutigalugu sumiiffinni assigiinngitsuni killiliussanut naleqqussagaasunik aaqqissuisarnerit, sulilu tamakku ilaartorneqarsinnaapput. Unamminerillu ikinnerulerneri peqqutigalugit piffissaqarnerulernerit qularnanngitsumik ilaatigut peqatigiiffinnit kattuffinniillu inerisaanernut atorneqarsinnaapput, Nuka Kleemann oqarpoq.

Aningaasanut immikkoortitanut 1,6 millionit koruuninut qinnuteqartoqarsinnaasoq taakkualu kattuffinnit peqatigiiffinillu timersornermik aaqqissuussanik ineriartortitsinermut pitsanngorsaanermullu qinnuteqarfigineqarsinnaasut, Kalaallit Nunaanni Timersoqatigiit Kattuffiata tamatuma saniatigut erseqqissaatigaa.