Nunatsinni ullumikkut ajornartorsiutaanerpaat ilagaat suliffissaaleqineq

Nunatsinni Naatsorsueqqissaartarfiup kisitsisaatai kingulliit suliffissaleqisut ikilerialaarsimanerannik takutitsigaluarput. Kisitsisilli illoqarfimmit illoqarfimmut assigiinngitsupilussuupput. Illoqarfiit ilaanni suliffissaaleqisut ikileriarsimapput allanili aamma amerleriarsimallutik.

Allattoq Karsten Sommer, Simon Uldum

oktobarip 14-at 2013 09:33

Inuit katillugit 3.061-it suliffissarsiortutut septembarip qaammataani nalunaarsorneqarsimapput, taakkunannga 467-it nunaqarfimmiuullutik.

Nunaqarfiit ilanngunnagit naatsorsoraanni, illoqarfinni suliffissarsiortutut nalunaarsorneqarsimasut septembarip qaammataani 2.594-iupput, 2012-imi qaammatip taamaalinerani 2.628-usimallutik.

Tassa illoqarfinni suliffissarsiortutut nalunaarsorneqarsimapput katillugit 34-nik ikileriarsimapput.

Illoqarfiit ataasiakkaat misissuataaraanni, Nuummi, Tasiilami, Qasigiannguani Upernavimmilu suliffissaaleqisut siorna septembarip qaammataanut naleqqiullugit ikileriarsimapput, illoqarfinnilu Paamiuni, Ilulissani Qaanaamilu suliffissaaleqisut amerleriangaatsiarsimallutik.

Suliffissarsiortutut nalunaarsuinermi inuit kommunimut suliffissaaleqinertik pillugu saaffiginnissimasut naatsorsorneqarneri pineqarput. Qaammatiup ataatsip iluani inuk ataaseq suliffissarsiortutut naatsorsugaasarpoq, qaammatip ingerlanerani ataasiarluni arlaleriarluniluunniit nalunaarsorneqarsimanera apeqqutaatinnagu.

suliffissarsiortutut nalunaarsukkat naatsorsornerat inuit qassiuneri qaammatikkuutaartumik naatsorneqartartut Nunatsinni Naatsorsueqqissaartarfiup paasissutissiissutigaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.