Nunatsinni tunisat pisiallu oqimaaqatigiinneranni amigartoorutit ikileriarput

Ukiup qaammataanni siullerni pingasuni nunanit allanit pisiavut 654 milionit koruuninik naleqarput, tunisavulli 444 millionit koruuninik naleqarlutik.

Tassa taamaalilluta nunanut allanut tunisatsinnit amerlanerusunik nunanit allanit pisisarpugut. Ajunngitsumilli ineriartortoqarpoq, ukiummi siulianut naleqqiullugu nunanut allanut tunisatta nalingi 11 millionit koruuninik amerleriarsimapput, nunanillu allanit pisiatta nalingi siornamut naleqqiullugit 22 millionit koruuninik ikileriarsimallutik.

Tamannali kisiannertaqalaarpoq, tassami nioqqutissat avataanit pisiarineqartut ikileriarpata, inuiaqatigiinni aningaasarliortoqarneranik atuinerullu minnerulersimaneranik aamma patsiseqarsinnaammata.

Avammut tunisat 11 millionit koruuninik amerleriaateqalaarnerannut aalisakkat raajallu tunisat amerleriarnerat patsisaavoq.

Nunap aningaasaqarneranut tunngasut nalilerniarnerini, tunisat pisiallu oqimaaqatigiinnerat atorlugu ajornannginnerpaamik nalilersuisoqarsinnaavoq.

Ineriartornerup ilorraap tungaanut aallariarnerani tunisat pisiallu oqimaaqatigiinneranni amigartoorutit maanna 209 millionit koruuniupput, taakkuli siorna piffissamut pineqartumut naleqqiullugit 31 millionit koruuninik pitsaanngoriaateqarlutik.