Nunatsinni timmissanik mianerinniffinnik nutaanik pilersitsoqarnissaa Pinngortitaleriffiup kaammattuutigaa

Nunatsinnimi timmissanik mianerinniffiusut amerlasuut, maanna timmiaarussimammata.

- Timmissanik mianerinniffiusutut taallugit ukiumiit ukiumut niuffigeqqusaanngitsutut taaguinnarnagit taama inissisimatikkunnaartariaqaraluarput, allallu timmiaqarfiusut, suli timmissanit najorneqartartut mianerisassanngortillugit, nalunaarusiortut ilaat Carsten Egevang allappoq.

Nunatsinni timmissanik mianerinniffiusuni timmissat atugarliortutut nalilerneqartariaqartut, nalunaarusiap uppernarsarpaa.

Ilaatigut Upernaviup Uummannallu eqqaani appat ineqarfii pineqarput. Ineqarfiit taakku appaarussimapput imaluunniit ikittuinnarnit najorneqarlutik.

Qeqertarsuup Tunuaniittut qilanngaqatigiit 1970-80-ikkunni amerlassusiinut naleqqiullugit ullutsinni 10-25 procentiinnanngorsimapput.

Upernaviup Uummannallu eqqaaniittut mianerinniffiusut sisamat atorunnaarsinneqarnissaat, nalunaarusiami tigussaasutut siunnersuutigineqarpoq aamma timmiaqarfiit taavaniittut allat amerlaqataat taama aqqiivigineqarnissaat innersuussutigineqarluni.

- Timmissat ikiliartornerinut patsisaasoq aalajangersimaffaarissoq taasinnaanngilarput, Carsten Egevang oqarpoq.

- Qularutissaanngilarli timmissat ineqarfiini eqqissiviilliortitsisarnerit soorlu unioqqutitsilluni piniartarnerit mannissarniartarnerillu sumiiffippassuarni ikiliartornerinut peqqutaaqataalluinnarmata. Avaqqunneqarsinnaanngilarli silap pissusiata kinguneranik nerisassaqassusiat nikerarsinnaasarmat, Carsten Egevang oqarpoq.

Nalunaarusiamili timmissat nungukkiartortut kisimik pineqanngillat. Tassami mitit Upernaviup Uummannallu eqqaaniittartut ukiuni qulikkaani kingullerni amerleriarujussuarsimapput aamma misissuinerup nalaani timmissat inerqarfii nutaat nassaarineqarput, tassa timmiaqatigiit allakkajaanerusut, soorlu kajuaqqat, tassa thorshanit naajakkullu ilaat sabinemåget ineqarfii nassaarineqarmata.