Nunatsinni timmisartuussineq silamit akornuserneqarpoq

Nunatsinni sineriak tamakkingajavillugu silarlunnerujussua pissutigalugu timmisartuussinissat arlalissuit Air Greenlandip ullumikkut taamaatiinnartariaqarsimavai. Timmisartorsuaq imarpik qulaallugu Narsarsuarmut ingerlaaraluartoq Københavnimut utiinnartariaqarsimavoq,

Københavnimiit Narsarsuarmut timmisartuussinissaq aqagu ingerlanneqassaaq.

Nunatsinni timmisartuussinissat makku eqqorneqarput: Nuummiit Nuummullu, Maniitsumut, Sisimiunut, Kangerlussuarmut, Aasiannut, Ilulissanut, Kulusummut, Narsarsuarmut kujataatalu sinneranut timmisartuussinissat taamaatiinnarput.

Silap ullumikkut ajornera pissutigalugu nunatsinni aqagu timmisartuussinissamut immikkut aaqqissuusisoqartariaqartoq Air Greenland ilisimatitsivoq.

Københavnip Narsarsuullu akornanni immikkut aamma timmisartuussisoqartariaqassaaq, Nuup Narsarsuullu akornanni aamma immikkut timmisartuussisoqassalluni.

Kulusuup Illoqqortoormiullu akornanni immikkut timmisartuussisoqassaaq, pingasunngormalli kingullermik tappavani timmisartumik angallassisoqarsinnaasimanngilaq. Islandimi timmisartuutileqatigiiffiup, Air Icelandip, timmisartuutaa Tunumi immikkut attartorneqassaaq.

Timmisartuussinissanik ullumikkut taamaatitsisariqarsimanermi ilaasussat 500-init amerlanerusut eqqorneqarput.