Nunatsinni timmisartortartut qasoqqallutik sulisarput
Timmisartortartunik apersuilluni misissuinermi, timmisartortartunik 575-inik peqataaffigineqartumi, timmisartortartut 90 procentii, qasunertik pissutigalugu timmisartortillutik kukkusimallutik akipput.
Timmisartortartullu misissuinermi peqataasut 82 procentiisa qanoq sivisutigisumik sulinissaq pillugu malittarisassat atuuttut, illersorneqarsinnaanngitsutut nalilerpaat. Misissuineq danskit inuussutissarsiutigalugu timmisartortartuisa kattuffiata, DALPA-p suliarititaat, Air Greenlandip timmisartortartuinit, 108-sunit aamma peqataaffigineqarpoq. Paasisat ilagaat eqqartorneqartumut assigusumik pisoqartarnera, tassalu ullormut sisuumik sulisimatilluni qasoqqasoqartartoq.
- Sivisuumik sulinerup kingunera Europamiut timmisartortartuisulli malugaarput. Sivisuumik sulisarneq pillugu inuit qasuissutut misigisinnaasarnerat malugilluinnartarparput, timmisartut inuttaasa peqatigiiffiani siulittaasoq, Ove Grødem oqarpoq.
2008-mi julip qaammataani, danskit malittarisassaat Europamiut malittarisassaannik taarserneqarput. Taamaalilluni sapaatip akunneranut qanoq sivisutigisumik sulisinnaaneq akunnerit 45-niit akunnerit 60-inut qaffanneqarpoq, timmisartortartullu 15 tiimit uninnatik timmisinnaallutik.
Qanoq sulitigisinnaanermut malittarisassat Air Greenlandimit atorluarneqarpat?
- Kinguaattoortoqartillugu angallannerpaaffiullu nalaani soorlu aasakkut, sulisinnaanerput annerpaaffimmiittarpoq, Ove Grødem akivoq.
Kalaallit Nunaanni timmisartortartunut ullup ingerlanerani aallaqattaarneq, silap allanngorarnera kiisalu avannaani ukiukkut taartumi timmisartorneq unammillernartuuvoq. Tamakkulu malittarisassani eqqarsaatigineqanngitsut, Ove Grødem isumaqarpoq.
Air Greenlandip pisortaanerata Michael Binzer misissuinerup inerneri isumakuluutissaanersut oqaatigerusunngilaa. Taassumalu malittarisassat Europami tamanut atuunnerat kisiat isiginiarpaa.
- Tamanna nammineerlunga isummerfigisinnaanngilara. Qularutiginngilluinnarpara tamatumunnga tunngasumut soqutigisagut Naalagaaffiup silaannakkut angallannermut Nakkutilliisoqarfiata oqartussaasutut isumagilluarsinnaagai. Air Greenlandimut pingaaruteqartoq tassaavoq timmisartortartutta Europami timmisartuutileqatigiit allat atugassarititaannut assinginik atugaqarlutik sulinissaat, Air Greenlandimi pisortaq, Michael Binzer oqarpoq.
Ove Grødem-illu malittarisassat europami tamanut atuutuunissaat isumaqataaffigaa.
- Siullermik imaattussaasorinngilara, timmisartortartut qasulileraangamik, tamanna namminneerlutik oqaatigisariaqartassagaat. Ullormi tassani kingullerpaamik timmisartortussanngornertik siuningerlugu qanoq qasulertigiumaarnertik takorloorsinnaassagaat ilimagineqarsinnaanngilaq.
- Aamma imassinnaanngilaq, timmisartuutileqatigiit sulisumik sulinerisa sivisussusissaanik namminneerlutik killilersuissasut. Taamaaliorunimmi timmisartuutileqatigiinnut allanut sulinerup sivisussusianik killilersuinngitsunut unammillersinnaassusiat sunnerneqassaaq.
Taamaammat isumaqarpunga EU timmisartortartunut tamanut toqqissinartunik, sulinerup sivisussusissaanik tunngasunik malittarisassiortariaqartoq, Ove Grødem oqarpoq.
Danskit angallannermut ministeriat, Hans Christian Schmidt, venstremeersoq ippassaq Politikenimut oqarpoq, suliami EU-kommissioni piaartumik iliuuseqaqqusimallugu.
