Nunatsinni tarnimikkut napparsimasut katsorsarneqartarnerat periarfissagissaarnerulerpoq

Fatuma Ali-p Dronning Ingridip Napparsimmaviani tarnip nakorsaatut ukiuni arfineq-pingasuni sulereerluni allartussanngortup, kingumut qiviarnermini tarnimikkut napparsimasut katsorsarneqartarnerat periarfissagissaarnerulersimanerarpaa.

- Tarnimikkut nappaatillit katsorsarneqartarnerat, Kalaallit Nunaanni ineriartorsimavoq. Sinerissami katsorsaanerit maanilu Nuummi napparsimasunik katsorsaanerit pitsanngorsimapput, tassalu napparsimasut napparsimmavimmut unitsinngikkaluarlugit katsorsaanerit annertusillutik. Taakku saniatigut, ukiuni kingullerni sulissutigaarput, inuusuttut tarnimikkut napparsimasut sullinneqartarnerisa annertusaaviginerat, taamaalillutik pitsaanerusumik sullinneqarnissaat anguniarlugu, Fatuma Ali oqarpoq.

Fatuma Alip aamma oqaluttuaraa, Danmarkimi matoqqasumik katsorsaasarneq, ukiorpassuarni Vordingborgimiissimasoq, Riskovimut nuunneratigut sullissineq pitsanngoriarsimasoq.

Fatuma Alip siunissaq qaamasumik takorloornerarpaa:

- Tarnimikkut napparsimasut katsorneqartarnerat isumalluarfigaara. Sinerissami maanilu Nuummi sullissisut eqeersimaartut pikkorissullu amerlaqaat, taamaattumik sullissineq pitsanngoriartuinnassasoq takorloorpara, Fatuma Ali oqarpoq.

Fatuma Alip nunatsinni tarnimikkut napparsimasunik sullissinini tamaanga killeqartinngilaa. Qaammatit pingasut allortarlugit, qaammat ataaseq sinerissami angalaarluni tarnimikkut napparsimasunik sullississagami.