Nunatsinni takornariartitsineq ajornartorsioqqajaavoq

Nunarsuup sinneratulli aningaasaqarnikkut ajalusoorneq takornariartitsinermik sulialinnut malunniuppoq maannalu Kalaallit Nunaanni Takornariaqarnermut Inuussutissarsiornermullu Siunnersuisoqatigiit oqaloqatigiinnissamut aggersaapput, tamatumani aningaasarsiornerup ajalusoornerata kinguneranik Kalaallit Nunaannut takornariartartut ikileriarsimanerat akiorniarlugu qanoq iliortoqarsinnaanersoq oqaluuserineqassammat.
aggustip 18-at 2009 12:35

Taama GTE ippassaq siulersuisut ataatsimiinneranni aalajangerpoq.

- Takusinnaavarput 2009-mi takornariartitsineq pitsaanngitsoq 2010-mi suli ajornerusumik malitseqarumaartoq. Taamaattumik takornariartitsinermik sulialinni piareersimanissap tamatuminnga pinngitsoortitsisussap aallartinneqarnissaa sapinngisamik piaarnerpaamik pisariaqarpoq, siulersuisuni siulittaasoq Bjarne Eklund oqaaseqarpoq.

Ingerlatseqatigiiffiup siornatigut oqaatigaa takornariartitsinermik suliaqartut namminneq 2009-mi ukiup siulianut naleqqiullugu 12 procentinik ikileriaateqarnissaq naatsorsuutigigaat, tamannalu ukiumut takornarianik 7.000-it missaaniittunik naleqarluni.

- Tunisaqartarneq uummarissarniarlugu suliniutit arlallit aallartinneqareerput. Maannakkorpiarli takornariartitsinermik sulallit peqatigalugit nutaamik allaanerusumillu eqqarsarnissaq pisariaqartinneqarpoq, pisortaaneq Thomas Rosenkrands oqaaseqarpoq.

GTE qanittukkut immikkut ittumik ataatsimiititsiniarluni aggersaassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq